Atyraý oblysynda suıytylǵan gazdy tutyný kólemi artty

Atyraý oblysynda suıytylǵan gazdy tutyný kólemi artty. Qazir gaz quıý beketterinde 195 tonna gaz qalǵan, dep habarlaıdy QazAqparat tilshisi.

Atyraý oblystyq energetıka jáne turǵyn úı-kommýnaldyq basqarmasy basshysynyń orynbasary Marat Qaramlaevtyń aıtýynsha, óńirde suıytylǵan gazdy tutyný qajettiligi 9-10 myń tonnany qurap otyr.

«Energetıka mınıstrliginiń suıytylǵan gaz jetkizý kestesine sáıkes qyrkúıekte Atyraý oblysynyń ishki naryǵyna 5 063 tonna bólingen. Ony «Atyraý munaı óńdeý zaýyty» JShS-dan jetkizledi. Búginge deıin gazben jabdyqtaýshy mekemeler 3 280 tonna gazdy tasymaldady. Endi qalǵan kólem – 1 783 tonna. Atyraý munaı óńdeý zaýytyndaǵy suıytylǵan gazdyń táýliktik óndirisi 500 tonnany quraıdy. Avtokólikter arqyly 100 tonna suıytylǵan gaz Atyraý oblysynyń ishki naryǵyna, 100 tonnasy Batys Qazaqstan oblysyna, al, 300 tonnasy temirjol joly arqyly Aqmola, Qostanaı oblystaryna jóneltilip jatyr. Atyraý oblysynyń ákimdigi suıytylǵan gaz tapshylyǵyn boldyrmaý maqsatynda Energetıka mınıstrligine, zaýytqa usynys hat joldap, tıisti jumystar júrgizdi. Sonyń nátıjesinde qazir zaýyttaǵy táýliktik gaz óndirisi 650 tonnaǵa deıin ósti. Atyraý oblysynyń ishki naryǵyna jóneltiletin gaz kólemi 250 tonnaǵa deıin ulǵaıdy. Bul gaz quıý beketterindegi kezekti azaıtýǵa, talonmen bosatýdy joıýǵa baǵyttaldy», -dep habarlady Marat Qaramalaev.

Onyń aıtýyna qaraǵanda, oblys ákimdigi tarapynan Energetıka mınıstrligine qosymsha gaz bólý jóninde usynys hattar joldanǵan. Gaz quıý beketterindegi 195 tonna suıytylǵan gaz qalǵan. Óńirde kún saıyn 200-250 tonna gaz tutynylady. Sondaı-aq, «Teńizshevroıl» kompanııasyna suıytylǵan gazben qamtasyz etý jóninde suranys hat jiberilgen.

Eske sala ketelik, Atyraý munaı óńdeý zaýyty suıytylǵan gazdy kólikpen áketýge tyıym salmaǵanyn jazǵan edik.