Atyraý oblysynda sýshıden 43 adam ýlanǵan, aýrýhanada 9 naýqas jatyr
ATYRAÝ. QazAqparat – Atyraý oblysynyń Jylyoı aýdanynda sýshıden 43 adam ýlandy. Qazir aýrýhanada 9 naýqas jatyr, dep habarlaıdy QazAqparat.
Buǵan deıin Jylyoı aýdandyq ortalyq aýrýhanasyna 16 adam túsip, keıin 29 adamnyń ýlanǵanyn, onyń 21-i emdelip jatqanyn, bir kúnnen soń taǵy 8 adamnyń ýlanǵanyn
habarlaǵan edik.
Oblystyq sanıtarııalyq-epıdemıologııalyq baqylaý departamenti baspasóz qyzmetiniń málimetine súıensek, 28-30 jeltoqsanda Jylyoı aýdandyq ortalyq aýrýhanasynyń juqpaly aýrýlar bólimine «Taǵamdyq toksıkoınfektsııa» dıagnozymen 43 naýqas kelgen. Naýqastardyń bári «Trı Samýraıa» dámhanasynan tapsyryspen aldyrǵan sýshıdi jegen soń dárigerlerge shaǵymdanǵan.
«Aýdandyq ortalyq aýrýhananyń juqpaly aýrýlar bóliminde 38 naýqas emdeldi. Al 5 naýqas óz qalaýymen ambýlatorlyq em alýǵa jiberildi. Qazir juqpaly aýrýlar bóliminde sýshıden ýlanǵandardan 9 naýqas qaldy. Bulardyń jaǵdaıy jaqsaryp keledi. Al basqa naýqastar densaýlyǵynyń túzelýine baılanysty aýrýhanadan shyǵaryldy. Sýshıden ýlanǵan naýqastarmen qarym-qatynasta bolǵandar anyqtalyp, medıtsınalyq baqylaýǵa alyndy» -dedi Jylyoı aýdandyq ortalyq aýrýhanasynyń dırektory Nurbek Úkibaev.
Oblystyq sanıtarııalyq-epıdemıologııalyq baqylaý departamenti baspasóz qyzmetiniń aqparatyna qaraǵanda, turǵyndarǵa sýshı satqan «Trı samýraıa» dámhanasy jabylǵan. Al, Jylyoı aýdandyq polıtsııa bólimi atalǵan derekke qatysty QR Qylmystyq Kodeksiniń 304-babynyń 1-bóligimen tergeý júrgizip jatyr.
