Atyraý oblysynda sýǵa batyp ketken balanyń denesi tabyldy
ATYRAÝ. QazAqparat - Atyraý oblysynda kesheden beri izdestirý jumystary júrgizilip, sýǵa ketken 9 jasar balanyń denesi tabyldy, dep habarlaıdy QazAqparat tilshisi.
Atyraý oblysy Tótenshe jaǵdaılar departamentiniń baspasóz qyzmetinen málim etkendeı, 26 sáýir kúni sýǵa batyp ketken 9 jasar balany izdestirý jumystary búgin tańerteń qaıta jalǵasty.
Qaıǵyly oqıǵa Jylyoı aýdanyndaǵy Qulsary qalasynyń janyndaǵy Qursaı kanalynda boldy.
Qutqarýshylar, týǵan-týystar, eriktiler izdestirý jumystaryn túni boıy júrgizdi. Búgin tańerteń súńgýirler izdeýdi qaıta bastady. Sýǵa batqan bala alǵashqy súńgý kezinde-aq saǵat 06 saǵat 35 mınýtta tabyldy. Denesi saraptama júrgizý úshin quqyqqorǵaý organdarynyń qyzmetkerlerine berildi.
Atyraý oblysynda 9 jasar bala kanalǵa batyp ketkenin buǵan deıin jazǵan bolatynbyz.
