Atyraý oblysynda sport kúni atap ótildi
ATYRAÝ. QazAqparat - Atyraýda Sport kúnin merekeleýge arnalǵan saltanatty shara ótti. Sharaǵa sport ardagerleri, jattyqtyrýshylar men sportshylar, halyqaralyq jáne respýblıkalyq jarystardyń jeńimpazdary qatysty, dep habarlaıdy QazAqparat tilshisi óńirlik kommýnıkatsııalar qyzmetine silteme jasap.
Oblystyq dene shynyqtyrý jáne sport basqarmasynyń bastamasymen jyl basynan beri óńirde kóptegen iri sporttyq sharalar ótti. Olarǵa jrgilikti turǵyndar belsendi qatysady. Mysaly, qaıyrymdylyq velojarysyna 1 myńnan astam adam qatyssa 3 myńǵa jýyq qala turǵyny jyl saıynǵy marafonǵa jáne 800 adam basqa da buqaralyq jarystarǵa qatysty.
Atyraý oblysynyń ákimi Nurlan Noǵaev óńirdiń úzdik sportshylaryn sportty damytýdaǵy jetistikteri úshin tósbelgilermen jáne alǵys hattarmen marapattady.
«Atyraý oblysynda sport júıeli damyp keledi. Bizdiń sportshylardyń respýblıkalyq jáne halyqaralyq deńgeıdegi jetistikteri az emes. Oǵan sportty damytý boıynsha oblysta saýatty saıasat júrgizilýi, oǵan jan-jaqty qoldaý kórsetilýi yqpal etti. Elbasynyń tapsyrmasyn oryndaý aıasynda oblysta sporttyń buqaralyq túrlerin damytýǵa basym kóńil bólinip otyr. Bul baǵyttaǵy jumystardy jalǵastyramyz. Álemdik deńgeıde jarysqa túsip, bıik tuǵyrlardan kórinip júrgen sportshylar - oblysymyzdyń maqtanyshy. Sondyqtan, barlyq bapkerlerge alǵysymdy aıtamyn. Sizder árbir sportshyny daıyndaýǵa aıanbaı eńbek sińirip, jan-tánimen qyzmet etip júrgen ustazsyzdar», - dedi Nurlan Noǵaev.
Atyraý oblysy - múmkindigi shekteýli adamdar dene shynyqtyrý jáne sportpen belsendi aınalysatyn jetekshi óńirlerdiń biri. 2008 jyly múmkindigi shekteýli adamdarǵa arnalǵan sport klýby qurylyp, barlyq qajetti sport jabdyqtarymen jaraqtaldy. Búginde 45 múmkindigi shekteýli sportshy Ulttyq Paralımpııalyq quramanyń múshesi. 11 sportshy - halyqaralyq dárejedegi sport sheberi, 27-i - Qazaqstan Repýblıkasynyń sport sheberi, 41-i sport sheberine kandıdattar.
Aıta keterligi, 2017 jyly 880 sporttyq shara ótkizilip, 175 myń adam tartyldy. Aǵymdaǵy jyldyń basynan beri 572 sporttyq shara ótkizilip, olarǵa 80 myńǵa jýyq adam qatysty. Búgingi kúnge bizdiń sportshylar túrli deńgeıdegi sporttyq jarystarda 494 medal ıelendi.
