Atyraý oblysynda sońǵy úsh jylda 1,5 myń bala vaktsına almaǵan
ATYRAÝ. QazAqparat – Sońǵy úsh jylda Atyraý oblysynda 1,5 myńnan astam bala ekpe almaǵan, dep habarlaıdy QazAqparat.
«2017 jyly ekpeden bas tartqandar sany - 484 bolsa, 2018 jyly - 502, al 2019 jyly – 509 adamǵa jetti. Bas tartýshylardyń kóbi oblys ortalyǵynda – 1063, odan keıin Jylyoı (151) jáne Qurmanǵazy (105) aýdandary tur. Ata-analardyń ekpeden bas tartýyna túrli sebepter bar. Birinshi kezekte dinı sebeppen saldyrmaý nemese vaktsına bala densaýlyǵyna zııan degen oımen bas tartý jıi kezdesedi. Elimizde balalar týǵannan 16 jasqa deıin ekpeniń 13 túrin alýǵa tıis. Onyń ishinde qyzylsha, qyzamyq, parotıt, gepatıt, týberkýlez sııaqty juqpaly aýrýlarǵa qarsy vaktsınalar bar», - deıdi oblystyq taýarlar men qyzmetterdiń sapasy men qaýipsizdigin baqylaý departamenti basshysynyń orynbasary Amantaı Jumaǵalıev.
Aıta keteıik, ótken jyly ata-analarmen júrgizilgen túsindirý jumysynan keıin 97 adam raıynan qaıtyp, balasyna ekpe salýǵa ruqsat bergen.
Eske sala keteıik, Atyraý oblysynda jyl basynan beri 15 adam qyzylsha juqtyrǵan.
