Atyraý oblysynda shomylý maýsymy eki apta keshigip bastaldy
Oblystyq tótenshe jaǵdaılar departamenti qoǵammen baılanys tobynyń málimetinshe, 15 maýsymda sýǵa shomylý kezeńi ashyldy.
«Atyraý oblysynda shomylýǵa arnalǵan 6 jaǵajaı bar. Onyń ishinde Atyraý qalasynda 3, Jylyoı aýdanynda 2 jáne Inder aýdanynda 1 jaǵajaı ornalasqan. Oblys turǵyndary men qonaqtaryna sýǵa shomylý kezinde qarapaıym erejelerdi saqtaýdy eskertemiz. Sýǵa shomylatyn arnaıy oryndy durys tańdaý qajet. Shomylýǵa bolmaıtyn belgiden aspaı, tyıym salynǵan jerge motorly kemelerge jaqyn júzbeý kerek. Ata-analar balalaryn qaraýsyz qaldyrmaǵany jón. Іshimdik ishken jaǵdaıda sýǵa túsýge bolmaıdy», -dep habarlady departamenttiń qoǵammen baılanys toby.
Sondaı-aq, tótenshelikter sýǵa ketý deregine baılanysty statıstıkalyq dáıekti usynyp otyr.
Birinshiden, sýdaǵy jazataıym oqıǵalardyń 95 paıyzy mas kúıinde shomylýdan bolady.
Ekinshiden, óz kúshin asyra baǵalaý da sýǵa batýǵa áser etedi. Úshinshiden, densaýlyqtyń kúrt nasharlaýy men qurysý ókinishke uryndyrady.
Budan buryn Atyraý oblysynda sý aıdyndaryna shomylý merzimi 15 maýsymǵa shegerilgenin habarlaǵan edik.
Sondaı-aq, Atyraý oblysy sý aıdyndarynda shomylýǵa qaýipti 70 ýchaske bar.
«Sý aıdyndarynda shomylýǵa qaýipti 70 oryn ýchaske anyqtaldy. Máselen, Atyraý qalasynda 17, Inder aýdanynda 10, Mahambette – 19, Qurmanǵazyda – 2, Jylyoıda – 7, Qyzylqoǵa aýdanynyń aýmaǵynda 15 qaýipti ýchaske tirkelip otyr. Bul ýchaskelerde shomylýǵa tyıym salynǵan 238 belgi men 9 aqparattyq taqtaısha ornatyldy», -dep málim etken edi qoǵammen baılanys tobynan.
