Atyraý oblysynda shomylý maýsymy bastalǵaly 8 adam sýǵa batyp ketti
Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, bıyl shomylý kezeńi 2 aptaǵa keshigip bastaldy.
«Sý – adam úshin qaýipti apat. Ádette, júze almaıtyn eresekter men balalar ókinishti oqıǵaǵa urynyp jatady. Tipti jaqsy júze alatyndar sýǵa batyp ketetin jaıt kezdesedi. Bıylǵy shomylý kezeńi bastalǵan 15 maýsymnan beri sý aıdyndarynda 8 adam batyp ketti. Onyń ishinde kámeletke tolmaǵan 2 bala bar. Mundaı oqıǵa ásirese, sýǵa shomylýǵa tyıym salynǵan jerlerde tirkeledi», -dep habarlady departamenttiń qoǵammen baılanys toby.
Tótenshelikter Atyraý oblysynyń turǵyndary men qonaqtaryna sýǵa aıdyndarynda shomylýǵa baılanysty birneshe keńesti usynyp otyr.
«Birinshiden, sý aıdyndaryndaǵy ruqsat etilgen ýchaskelerde ǵana shomylý qajet. Ekinshiden, ata-analar kámeletke tolmaǵan balalardy óz betimen sý aıdyndaryna jibermegeni, olardy qaraýsyz qaldyrmaǵany jón. Úshinshiden, sý temperatýrasy +16°S tómen bolsa, shomylýdy keıinge qaldyrǵan durys. Sý temperatýrasy +17 °S-den +19 °S, aýanyń temperatýrasy +25°S bolǵanda, sýda 10-15 mınýttan artyq shomylmaý kerek. Tórtinshiden, tamaqtanýdan keıin 1,5 saǵattan soń ǵana shomylýǵa bolatynyn eskertemiz», -dep málim etti departamenttiń qoǵammen baılanys tobynan.
Eske sala ketelik, buǵan deıin Atyraý oblysy sý aıdyndarynda shomylýǵa qaýipti 70 ýchaske baryn habarlaǵan edik.
