Atyraý oblysynda sheteldikterge qarsy 21 qylmys jasalǵan
«Polıtsııa qyzmetkerleri sheteldik azamattardyń elimizdiń kóshi-qon zańdylyǵyn saqtaýyn udaı nazarda ustap otyr. Bıylǵy jyl basynan Atyraý oblysynda ýaqytsha turý úshin 18 985 sheteldikke ruqsat berildi. Onyń ishinde alys shet memleketterden kelgen – 2 676, TMD aýmaǵyndaǵy elderden 16 309 adam kelgen. Elimizdiń kóshi-qon zańdylyqtaryn buzǵany úshin 3 555 mıgrant ákimshilik jaýapkershilikke tartyldy. Al 80 sheteldik elimizdiń aýmaǵynan tysqary shyǵaryldy», - dep habarlady Atyraý oblystyq Polıtsııa departamentiniń baspasóz qyzmetinen.
Óńirde QR Qylmystyq kodeksiniń 392-babymen (Qazaqstan Respýblıkasynyń Memlekettik shekarasyn qasaqana zańsyz kesip ótý), 394-babymen (Zańsyz kóshi-qondy uıymdastyrý) 6 derek tirkelgen. Qazir tergep-tekserý amaldary júrgizilip jatyr.
«Jyl basynan Atyraý oblysyna kelgen sheteldikter tarapynan jasalǵan 5 qylmys tirkeldi. Al sheteldikterge qarsy 21 qylmys jasalǵany anyqtaldy», - dep málim etti departamenttiń baspasóz qyzmetinen.
Buǵan deıin Atyraý oblysynda ýaqytsha turýǵa ruqsat berilgen sheteldikter qatary kóbeıgenin jazǵan bolatynbyz. Bıylǵy 4 aıda kóshi-qon zańnamasyn buzǵany úshin 2 775 adam ákimshilik jaýapkershilikke tartylǵan. Al 70 sheteldik elimizdiń aýmaǵynan tysqary shyǵaryldy.
