Atyraý oblysynda «Shep» beketiniń qyzmetkerlerine para aldy degen aıyp taǵyldy
ATYRAÝ. QazAqparat - Atyraý oblysynda «Shep» baqylaý-ótkizý beketiniń qyzmetkerlerine para aldy degen aıyp taǵylyp otyr, dep habarlaıdy «QazAqparat» HAA tilshisi.
«Atyraý oblysy ІІD «Shep» beketiniń qyzmetkerleri B.Nurlanov, B,Maqaýov, R.Nıetalıevke qatysty sotqa deıingi tergeý aıaqtaldy. Olar «Shep» baqylaý-ótkizý beketi arqyly Qazaqstan Respýblıkasynyń aýmaǵyna kedergisiz ótkizgeni úshin kásipkerlerden júıeli túrde para alyp otyrǵan. Para kólemi 900-den 5 000-ǵa deıin reseı rýblin nemese 5 000-nan 27 000 teńgeni qurady», - delingen Atyraý oblysy boıynsha sybaılas jemqorlyqqa qarsy ulttyq bıýro departamentiniń habarlamasynda.
Qurmanǵazy aýdandyq sotynyń úkimimen kinálilerge aıyppul tóleý jazasy kesildi. B.Nurlanov - 2,7 mln teńge, B.Maqaýov - 760 myń teńge, R.Nıetalıev - 324 myń teńge. Para alǵany úshin kináli dep tanylǵandar ómir boıy memlekettik qyzmette, quqyq qorǵaý organdarynda qyzmet atqarý quqyǵynan jáne ataq dárejelerinen aıyryldy. Zańsyz jolmen alynǵan múlikteri tárkilendi.
