Atyraý oblysynda shalǵyn kóbeleginen 100-ge jýyq sharýashylyq zııan shekken
Qaırat Nurlybaevtyń aıtýynsha, Inder, Mahambet aýdandary men Atyraý qalasynyń mańyndaǵy egin alqaptarynda shalǵyn kóbelekteri qaptaǵan. Odan egin alqaptaryna zııan kelip jatyr.
«Egin alqaptaryn qurt, kóbelekterdiń qaptaýy 30 jyldan keıin qaıtalanyp otyr. Qazir Batys Qazaqstan oblysynan ýlaý jumystaryn júrgizetin arnaıy mekeme men mamandar shaqyryldy. Ýlaý jumysy bastaldy. Qurt, kóbelekterdiń qansha gektar aýmaqqa jaıylyp ketkeni belgisiz. Bul anyqtalyp jatyr. Bizdiń basty maqsatymyz – eginshilerdiń egin alqabyn, odan keıin jaıylymdyq jerdi qorǵaý. Jalpy qurt, kóbelekter 2020 jylǵa deıin óńdeletin zııankes jándikterdiń tizbesinde boldy. Sol jyly ony tizbeden alyp tastady. Bıyl ony qaıta qosý qarastyrylyp otyr. Eger óńdeletin zııankester tizbesine engiziletin bolsa, jergilikti bıýdjetten qarjy bólý máselesi qarastyrylady», - deıdi Qaırat Nurlybaev.
Onyń málimetine súıensek, óńirde egin ósirýmen aınalysatyn 300-den astam sharýashylyq bar. Onyń 100-ge jýyǵy shalǵyn kóbeleginen zardap shekken.
«Qalyptasqan jaǵdaıdyń zardaptaryn joıý jóninde aýdandarda jedel qyzmet uıymdastyryldy. Oral qalasynan kelgen ýlaý dári-dármegin shashýmen aınalysatyn 2 kólik kúnine shamamen 1000 gektardan astam aýmaqty qamtıdy. Atalǵan jumysqa jergilikti bıýdjetten shamamen 8-10 mln teńge kóleminde qarjy bólý qarastyrylyp otyr. Eger ýlaıtyn aýmaqtyń kólemi artsa, qosymsha qarjy bólý máselesin qarastyrý josparlanyp otyr», - deıdi Qaırat Nurlybaev.
Eske sala ketelik, buǵan deıin Atyraý oblysynda shalǵyn kóbelegi egin alqaptaryna zııan keltirip jatqanyn habarlaǵan bolatynbyz.