Atyraý oblysynda shalǵyn kóbelegi egin alqaptaryna zııan keltirip jatyr
Oblys ákimi Serik Shápkenovtiń aıtýynsha, sharýalardyń Mahambet, Inder aýdandary men Atyraý qalasynyń mańyndaǵy jaıylymdyq, egin alqaptaryna shalǵyn kóbelegi qaptap, zııan keltirýde.
«Osyǵan baılanysty salaǵa jaýapty orynbasaryma naqty tapsyrma berdim. Tótenshe jaǵdaıdyń aldyn alý úshin aýdandarda jedel jumystardy uıymdastyryp, ýlaý júrgizetin mekeme men arnaıy mamandardy shaqyrý qajet. Olar tez arada jumysqa kirisýge tıis», - dedi Serik Shápkenov.
Ákimniń pikirinshe, jaýapty basshylardyń sharýalardy uıymdastyrý jumystary jeke baqylaýynda bolady.
Osyǵan uqsas jaıt mamyrda Atyraý oblysynyń Qyzylqoǵa aýdanynda tirkelgen edi. Munda jýsan qurtynan 800 gektar jaıylym zaqymdanǵan. Agroónerkásip keshenindegi memlekettik ınspektsııa komıteti Atyraý oblystyq aýmaqtyq ınspektsııasynyń bólim basshysy Ábıla Qazıevanyń aıtýynsha, zaqymdanǵan jaıylymǵa zertteý júrgizilgen.
«Qyzylqoǵa aýdanynda ár jyldary mundaı zııankes kezdesip júr. Alaıda, jaıylymǵa zııany tımegen edi. Al, bıyl 800 gektar jaıylymda jýsan jemiriniń dernásili ártúrli jas satysynda ekeni anyqtaldy. Máselen, Saǵyz aýyldyq okrýgindegi «Ánet», «Alyp Ana» sharýa qojalyqtarynyń árqaısysyna tıesili 200, «Toşıı» sharýa qojalyǵynyń 100, Muqyr aýyldyq okrýginde tirkelgen «Qyzyl bulaq» sharýa qojalyǵynyń 100 gektar jaıylymy jýsan jemirinen zaqymdanǵany anyqtalyp otyr. Sondaı-aq «Saǵyz – Mııaly» baǵytyndaǵy joldyń boıynda ornalasqan Sarqýjaq ýchastoginde de 100 gektar jaıylymdyq jerge zııan kelgen», - deıdi Ábıla Qazıeva.
Onyń aıtýyna qaraǵanda, sharýa qojalyqtary osyndaı zııankesterge qarsy kúres sharalaryn óz qarajaty esebinen júrgizýi kerek.
Eske sala ketelik, budan buryn Atyraý oblysyndaǵy 800 gektar jaıylym jýsan qurtynan zaqymdanǵanyn jazǵan edik.
