Atyraý oblysynda shaǵyn jáne orta bıznesti damytýǵa 560 mln teńge bólindi
ATYRAÝ. QazAqparat - Atyraý oblysynda shaǵyn jáne orta bıznesti damytýǵa 560 mln teńge bólindi. Memlekettik baǵdarlama boıynsha 56 bıznes joba qarjylyq qoldaýǵa ıe boldy, dep habarlaıdy «QazAqparat» HAA tilshisi Óńirlik kommýnıkatsııalar qyzmetine silteme jasap.
Mundaı aqparat oblystyq máslıhattyń kezekti sessııasynda jarııalandy. Búgingi tańda aımaqtaǵy kásipkerliktiń belsendi damýynyń arqasynda jańa jumys oryndary ashylýda. Osylaısha, aǵymdaǵy jylda jergilikti turǵyndar byltyrǵy jyldyń kórsetkishimen salystyrǵanda, 4,6 ese artyq jumyspen qamtyldy.
Paıyzdyq mólsherlemeler sýbsıdııasyna 4,7 mlrd teńgege 93 bıznes joba bekitildi. Aımaqtaǵy jańa kásiporyndardyń ashylýy jańa 200 jumys ornyn qurýǵa múmkindik berdi. Qulsary qalasynda eki jergilikti turǵyn jalpy somasy 21 mln teńgeni quraıtyn shaǵyn nesıe aldy jáne taǵy 5 bıznes jobany júzege asyrýǵa 9 mln teńge bólindi.
Budan ózge, áleýmettik kásipkerlikti damytý maqsatynda «TShO» JShS bıylǵy jyly «Jarqyra» baǵdarlamasy aıasynda 6 jobaǵa arnalǵan qaıtarymsyz granttar usyndy, 2 bıznes jobany júzege asyrýǵa paıyzsyz nesıe retinde 6 mıllıon teńge berildi.
