Atyraý oblysynda Senat depýtatyn saılaýǵa úsh kandıdat qatysyp jatyr
Atyraý oblystyq aýmaqtyq saılaý komıssııasynyń aqparatyna súıensek, Atyraý oblysynan Senat depýtattyǵyna 6 adam ózin-ózi usynǵan. Keıin bes kandıdat tirkelgen. Onyń arasynda 1 áıel, 5 er adam bolǵan.
«Oblystyq aýmaqtyq saılaý komıssııasy kandıdattardyń Konstıtýtsııamen jáne Konstıtýtsııalyq zańmen qoıylatyn talaptarǵa sáıkestigin belgileý jóninde tıisti suraý salýlar joldady. Sonyń nátıjesinde 5 kandıdattyń sáıkestigi rastaldy. Al, 1 kandıdattyń sottalǵandyǵy belgilengen tártippen ótelmegen nemese alyp tastalmaýyna baılanysty qoıylatyn talaptarǵa sáıkes kelmedi», -dep málim etti saılaý komıssııasynan.
Saılaý týraly zańda belgilengen tártippen kandıdattar tirkelgennen keıin oblystyq aýmaqtyq saılaý komıssııasy memlekettik kirister departamentine aktıvteri men mindettemeleri týraly málimetterdiń durystyǵyn tekserýge suraý salýdy joldaǵan. Soǵan sáıkes kandıdat Erbol Imanǵalıevtiń deklaratsııany tapsyrý kezinde ózi jáne zaıyby deklaratsııalaǵan aktıvteri men mindettemeleri týraly málimetterdiń anyq emestigine, al, Qanatbek Qasymǵalıevtiń jeke ótinishine baılanysty olardy tirkeý týraly sheshimderdiń kúshi joıylǵan.
«Búgin Senat saılaýynda ár deńgeıdegi máslıhattardyń 132 depýtaty 3 kandıdatqa daýys beredi. Kandıdattardyń ishinde 1 áıel, 2 er adam bar. Kandıdattardyń 2-eýi – memlekettik kásiporyn men mekemeniń, al, 1-eýi – máslıhat apparatynyń qyzmetkeri. Olar zańger, aýyl sharýashylyǵy jáne bilim salasynyń qyzmetkeri mamandyǵyn alǵan. Olardyń ortashy jasy – 57-de», -dep málim etti saılaý komıssııasynan.
Eske sala ketelik, budan buryn Atyraý oblysynda 3 kandıdat Senat saılaýyna túsetinin jazǵan edik.
