Atyraý oblysynda sarbazdyń qaıtys bolýyna baılanysty qylmystyq is qozǵaldy

ATYRAÝ. QazAqparat – Atyraý oblysynda áskerı qyzmetshi qaıtys boldy. Qylmystyq is qozǵaldy, dep habarlaıdy QazAqparat tilshisi.

Bul derekti rastaǵan Ulttyq qaýipsizdik komıteti baspasóz qyzmetiniń aqparatyna qaraǵanda, Shekara qyzmetiniń áskerı qyzmetshisi Nurbek Erǵalıev 17 tamyzda qaıtys bolǵan. Áskerı qyzmetshi Atyraý oblysyndaǵy memlekettik shekara ýchaskeleriniń birinde qyzmetin ótkerip júrgen.

«Sot-medıtsınalyq saraptaý nátıjesi boıynsha «kenetten bolǵan júrek ólimi» anyqtaldy. Áskerı qyzmetshiniń ólimi faktisine qatysty tergeý organdary qylmystyq is qozǵady. UQK Shekara qyzmetiniń basshylyǵy men jeke quramy áskerı qyzmetshiniń týǵandary men jaqyndaryna qaıǵyra kóńil aıtyp, qaza tapqan adamnyń otbasyna qajetti kómek berý sharalaryn qabyldaıdy», - dep habarlady UQK baspasóz qyzmetinen.

Keı derekke qaraǵanda, qaıtys bolǵan áskerı qyzmetshi Mańǵystaý oblysynan áskerge shaqyrylǵan. Atyraý oblysynyń Isataı aýdanyndaǵy shekara zastavasynda qyzmet atqarǵan. Onyń áskerı mindetin atqarý merzimi aldaǵy kúzde aıaqtalýy tıis bolǵan.

Eske sala ketelik, budan buryn Jaıyqtyń jaǵasynda turǵan qaıyqta oınap júrgen bala sýǵa batyp ketkenin jazǵan edik.