Atyraý oblysynda sábıler shetineýiniń jıilep ketý sebepteri aıtyldy
ATYRAÝ. QazAqparat - Atyraý oblysynda pedıatorlar men perınataldyq ortalyqtyń mamandary bala óliminiń jıilep ketýine qatysty túsinikteme berdi, dep habarlaıdy QazAqparat Óńirlik kommýnıkatsııalar qyzmetine silteme jasap.
Aıta keterligi, birqatar BAQ-ta Atyraý oblysynda bala óliminiń kóbeıgeni týraly materıaldar shyqqan bolatyn.
ÓKK-degi baspasóz konferentsııasynda Oblystyq perınataldyq ortalyqtyń bas dárigeri Qýanysh Nysanbaev jańa týǵan sábıler arasyndaǵy ólimniń basty sebebi ata-analarynyń densaýlyǵyna qatysty ekenin málimdedi.
«Bala óliminiń basym bóligi ýaqytynan buryn bosanǵandarǵa tıesili. Bul josparlanbaǵan júktilik dep te aıtýǵa bolady. Júktilikti josparlaý kerek, kem degende 1,5 jyl aralyqty saqtaý kerek. Bul jerde aldyn alý sharalarynyń mańyzdylyǵyn da aıta ketken jón. Bizdiń ortalyqta medıtsınalyq qyzmetterdiń sapasy baqylaýǵa alynǵan. Bosanǵan áıeldermen jumys júrgiziledi», - dedi Qýanysh Nysanbaev.
Merzimimen buryn bosaný jáne bala salmaǵynyń az bolý ólimge ákelip soqtyrady. 2018 jyly oblystyq perınataldyq ortalyqta 108 jańa týǵan sábı ólimi tirkeldi.
«Bizdiń ortalyqta ýaqytynan buryn bosanatyndar sany artyp otyr, sonyń ishinde salmaǵy óte tómen sábıler de bar. 2018 jyly salmaǵy tómen 300 náreste tústi, olardyń ımmýndyq júıeleri de tómen deńgeıde bolady. Analarynyń da aýrýlary bar ekendigi anyqtaldy. Intergenıkalyq aralyqty saqtamaý problemasy da jıi kezdesedi. Bir qaraǵanda jaı nárse bolyp kórinýi múmkin, biraq osynyń bári balanyń ımmýndyq júıesine áser etedi. Qaıtalap aıtaıyn, shala týǵan, salmaǵy 1,5 keliden tómen sábıler sany kóbeıdi», - deıdi Oblystyq perınataldyq ortalyqtyń neonatologııa bólimi meńgerýshisi Gúlmıra Ábekeeva.
Oblystyq perınataldyq ortalyqtyń bas dárigeri bul jaǵdaıdy áıelderdiń psıhologııalyq jaǵdaıymen jáne júktilik protsesimen baılanystyrady.
«Barlyq emhanalar men aýdandyq aýrýhanalarda otbasyn josparlaý jáne reprodýktsııa bólimderi ashyldy. Barlyq jerde patronajdy meıirbıke bar, olar jas analarmen jumys istep, bárin túsindiredi. Analar mektebi bar. Oqyǵan mamandar bar jáne bul bárine qoljetimdi. Aldyn alý sharalaryna qajet jaǵdaılar jasalǵan, tek solarǵa baryp, aıtqan nusqaýlarynyń bárin tolyq oryndaý kerek. Biraq kóp jaǵdaıda bul aıtylǵandar oryndalmaıdy», - dep atap ótti Qýanysh Nysanbaev.
Oblystyq densaýlyq saqtaý basqarmasynyń shtattan tys pedıatry Raısa Baımuqanova sońǵy eki jyldaǵy balalar óliminiń sanyn aıtty. 2018 jyly oblys boıynsha 1 jasqa deıingi sábılerdiń ólimi 176-ǵa jetken.
«Árıne, bul jaqsy kórsetkish emes, biraq bul dárigerlerdiń biliktilikteriniń tómendigin kórsetpeıdi. Ár ólim tirkeledi, eshteńe jabyq qalmaıdy. Ár jaǵdaı boıynsha jan-jaqty taldaýlar júrgiziledi. Bul máselemen sarapshy dárigerler, aýdıtor dárigerler aınalysyp, jekelegen jaǵdaılar boıynsha tolyq saraptama jasalady. Áıelderdiń densaýlyqtary kóńil kónshitpeıdi, bul máselede de qur qarap otyrǵanymyz joq. Aldyn alý sharalary júrgizilip jatyr», - dedi Raısa Baımuqanova.
