Atyraý oblysynda «Rýhanı jańǵyrý» baǵdarlamasy aıasynda 86 joba júzege asyrylady
ASTANA. QazAqparat - Keshe Atyraý oblysynyń ákimi Nurlan Noǵaevtyń tóraǵalyǵymen «Bolashaqqa baǵdar: rýhanı jańǵyrý» memlekettik baǵdarlamasyn júzege asyrý jónindegi saraptama keńesiniń birinshi otyrysy ótti, dep habarlaıdy Atyraý oblystyq óńirlik kommýnıkatsııalar qyzmeti.
Búgingi kúni belgilengen 86 jobanyń 21-i júzege asyrylǵan, qalǵan 65-in jyl sońyna deıin aıaqtaý josparda bar. Osy maqsatqa jergilikti bıýdjetten 155 mıllıon teńge bólindi. 2021 jylǵa deıingi qarjylandyrýdyń jalpy somasy 1,7 mıllard teńge boldy.
Saraptama Keńesiniń basty mindeti - baǵdarlamaǵa enetin jobalardy qaraý, bekitý. Keńes quramyna aımaqtaǵy belgili ǵalymdar, ólketanýshylar, tarıhshylar men qoǵam qaıratkerleri kirgen.
86 joba jańa ıdeıalarmen, qyzyqty usynystarmen tolyǵady.
Búginge deıin jobalyq keńsede túrli deńgeıdegi ákimdik, basqarma, mekemeler usynǵan 162 joba qaraldy.
Ótken májiliste 43 mańyzdy joba ortaǵa salyndy. Olardyń arasynda «Aqmeshit» qorymyn jańǵyrtý, Atyraý qalasynda «Qazaq eli» ortalyǵyn salý jobalary bar. Bastamalardy jergilikti bıýdjetpen qatar demeýshiler de qarjylandyrady.
«Memleket basshysy atalǵan baǵdarlama aıasynda qazaqstandyq qoǵamdy jańǵyrtýǵa qatysty kezeńdik qadamdardy usyndy», - dedi májilisti qortyndylaǵan oblys ákimi Nurlan Noǵaev.
«Biz halyqtyń barlyq toptaryn qamtýǵa tıispiz, jumysqa qoǵamdyq uıymdar da tartylady, oblystyń ár turǵyny baǵdarlamanyń bir múshesi bola alady. Sol kezde ǵana osy baǵyttaǵy jumystarymyzda jaqsy nátıjelerge qol jetkizemiz».
