Atyraý oblysynda respýblıkalyq tas joldarǵa «Sergek» kameralary ornatylady
Atyraý oblystyq polıtsııa departamenti bastyǵynyń orynbasary Rýslan Sadırovtyń aıtýynsha, respýblıkalyq jjáne oblystyq mańyzy bar birneshe jolǵa «Sergek» kameralaryn ornatý kózdelip otyr.
«Qoǵamdyq tártipti saqtaý jáne jol qaýipsizdigin qamtamasyz etý maqsatynda «Kórkemtelekom» kompanııasynyń qyzmetkerlerimen «Sergek» kameralaryn ornatý máselesi talqylandy. Maqsat – Atyraý oblysy aýmaǵynda qylmystar sanyn azaıtý, jol-kólik oqıǵalarynyń aldyn-alý. «Kórkem-Jaıyq» fılıalymen jasalǵan kelisimshartqa sáıkes Atyraý qalasynyń aýmaǵynda 2020 jyly 2 «Sergek» júıesiniń 2 748 kamerasy ornatyldy. Atalǵan qurylǵylar qoǵamdyq tártipti saqtaý maqsatynda úı aýlalarynda, adamdar kóp shoǵyrlanatyn oryndar men jol qaýipsizdigin qamtamasyz etý úshin avtokólik joldarynyń boıynda, kóshe qıylystarynda jumys istep tur. Bul kameralar túrli qylmysty boldyrmaý men jol qaýipsizdigin saqtaýǵa septigin tıgizdi», -deıdi Rýslan Sadırov.
Endi qysqa merzimde Atyraý qalasynda «Sergek» qurylǵylarynyń sanyn arttyrý, sondaı-aq, shahar syrtyndaǵy respýblıkalyq, oblystyq mańyzy basym joldarǵa ornatý kózdelip otyr. Budan bylaı respýblıkalyq Aqtóbe-Atyraý-Reseı Federatsııasynyń shekarasy, Atyraý-Oral, Dossor-Qulsary-Beıneý jáne oblystyq mańyzy bar Atyraý-Inder, Inder-Qarabaý-Mııaly-Saǵyz baǵytyndaǵy tas joldarǵa kamera ornatý máselesi pysyqtaldy. Kameralardyń araqashyqtyǵyn jıiletiledi.
«Qurylǵylar jaqyn arada qala syrtyndaǵy tas joldarǵa ornatylady. Kameralardyń arqashyqtyǵy jıileıdi. Sebebi qala syrtyndaǵy tas joldarda adam ólimine soqtyrǵan jol-kólik oqıǵasy jıi tirkeledi», -dep málim etti Rýslan Sadırov.
Eske sala ketelik, buǵan deıin Atyraý oblysynda alty aıda jol apatynan 40 adam mert bolǵanyn habarlaǵan edik.