Atyraý oblysynda polıgonda qoqys órtegen seriktestik aıyppul tóledi
Jylyoı aýdanyndaǵy «Promekologııa» JShS-niń óndiristik polıgonynda óndiristik jáne turmystyq qaldyqtar órtengen. Áleýmettik jelide polıgondaǵy qara tútinniń býdaqtaǵany túsirilgen vıdeo tarady.
Oblystyq ekologııa departamentiniń baspasóz qyzmetinen málim etkendeı, polıgon aýmaǵynda aǵash jańqalary tutanǵan. Keıin qatty jeldiń saldarynan jalyn eski shınalar jınalǵan alańǵa taraǵan. Jalyn 100 sharshy metr aýmaqty sharpyǵan.
«Osyǵan baılanysty oblystyq ekologııa departamentine Jylyoı aýdanynyń prokýratýrasynan qatynas hat pen jergilikti turǵyn M.Nurǵazıevtiń ótinishi tústi. Departament mamandary tekserý júrgizip, «Promekologııa» JShS-niń polıgonyndaǵy janǵan qaldyqtar úshin ákimshilik quqyqbuzýshylyq týraly hattama toltyryldy. Seriktestikke qysqartylǵan túrde 86 myń 250 teńge ákimshilik aıyppul salyndy. Aıyppul óndirilip alyndy», -dep habarlady departamenttiń baspasóz qyzmeti.
Eske sala ketelik, budan buryn Atyraý oblysynda zańsyz 34 polıgon anyqtalǵanyn habarlaǵan edik.
Keıin ǵaryshtan barlaý arqyly 68 qoqys alańy tabylǵanyn jazǵan bolatynbyz.
Atyraý oblystyq ekologııa departamentiniń basshysy Álibek Bekmuhametovtiń aıtýynsha, «Qazaqstan Ǵarysh sapary» UK» AQ túsirilimimen anyqtalǵan qoqys alańdary geoportaldyń bazasyna tirkelgen.
«Atyraý oblysynyń aýmaǵynda 68 zańsyz ornalasqan qoqys orny anyqtaldy. Onyń ishinde Atyraý qalasynda 63 qoqys orny bar. Al, Jylyoı aýdanynyń aýmaǵynda - 3, Maqat aýdanynda - 2 qoqys alańy ornalasqan. Qazir qoqys alańdaryn tazalaý jumystar óte baıaý júrgizilýde. Áli kúnge deıin aıaqtalǵan joq. Tazalanǵan oryndar týraly aqparattar men qujattar geoportaldan alyp tastaý úshin departamentke joldanbaı otyr», -dep málim etti Álibek Bekmuhametov.
