Atyraý oblysynda polıtseıler órtengen úıden 7 adamdy qutqardy
ATYRAÝ. QazAqparat – Atyraý oblysynda polıtsııa qyzmetkerleri órtengen úıden 7 adamdy qutqardy, dep habarlaıdy QazAqparat.
Oblystyq polıtsııa departamenti baspasóz qyzmetiniń málimetinshe, órt Qurmanǵazy aýdanynyń Maqash aýyldyq okrýginde bolǵan.
«Ýchaskelik polıtsııa ınspektory Talǵat Rahımov pen kómekshisi Birjan Mahmýdov, polıtsııa qyzmetkeri Baǵytjan Qadyrbaev túngi saǵat 01:00 shamasynda aýyldaǵy turǵyn úıdiń birinen órt shyqqanyn baıqaǵan. Polıtseıler oqıǵa ornyna jedel jetip, órtengen úıden 4 eresek adam men 3 balany qutqardy» -dep habarlady departamenttiń baspasóz qyzmeti.
Polıtseıler órt sóndirýshiler kelgenge deıin jalyndy sóndirýge kómektesken.
Eske sala ketelik, budan buryn atyraýlyq polıtseı Jaıyq ózenine túsip ketken eki jasóspirimdi qutqarǵan bolatyn.
