Atyraý oblysynda polıtseıden eskertý alǵan júrgizýshi 2 saǵattan soń apatqa ushyrady
Atyraý oblystyq Polıtsııa departamentiniń baspasóz qyzmetinen málim etkendeı, Ózbekstan Respýblıkasynda tirkelgen Lada Largus avtokóliginiń júrgizýshisi polıtsııa eskertýin elemegen.
«Atyraýlyq polıtseıler oblys jáne aýdan ortalyqtarynan shyǵa beris tas joldarda kólik júrgizýshilerine jol qaýipsizdigin nazardan shyǵarmaý qajettigin aıtyp, túsindirý jumystaryn qolǵa aldy. Alaıda polıtsııa qyzmetkerleriniń eskertýin elemeıtin júrgizýshiler bar. Máselen, keshe, 20 shilde kúni saǵat 14:35 shamasynda Ózbekstan Respýblıkasynda tirkelgen Lada Largus avtokóligi Inderbor kentiniń tusynda toqtatyldy. Kólik júrgizýshisine jyldamdyqty asyrmaý, júk tıelgendikten basyp ozý qaǵıdalaryn qatań saqtaý qajettigi eskertilgen. Atalǵan avtokólik júrgizýshisi 2 saǵattan soń, 16:40 shamasynda Oral-Atyraý tas jolynda aýdarylyp, jol apatyna ushyrady», - dep habarlady departamenttiń baspasóz qyzmeti.
Kólikte júrgizýshimen birge 6 jolaýshy bolǵan. Olardyń eshqaısysy jaraqat almaǵan.
«Júrgizýshilerge jolda júrý qaýipsizdigin qatań saqtaý qajettigin eskertemiz. Ásirese, kólik jyldamdyǵyn shamadan tys asyrmaý, basyp ozý qaǵıdalaryn qatań saqtaý kerek», - dep málim etti departamenttiń baspasóz qyzmeti.
Eske sala ketelik, budan buryn Atyraý oblysyndaǵy respýblıkalyq joldarda kólik apatynan 33 adam kóz jumǵanyn habarlaǵan edik.
Patrýldik polıtsııa rotasynyń komandıri, polıtsııa kapıtany Ádilbek Shahmetovtiń málimetinshe, respýblıkalyq mańyzy bar tas joldarda jyl basynan beri kólik apatynyń saldarynan 33 adam mert bolǵan, 57 adam ártúrli dene jaraqatyn alǵan.
