Atyraý oblysynda Ózbekstannyń 91 kásiporny jumys isteıdi
ATYRAÝ. QazAqparat – Atyraý oblysynda Ózbekstannyń 91 kásiporny jumys isteıdi, dep habarlaıdy QazAqparat.
Bul týraly Atyraý oblysynyń ákimi Serik Shápkenov pen Ózbekstan Respýblıkasynyń Aqtaý qalasyndaǵy bas konsýly Atabek Tursynbekovtiń kezdesýi kezinde belgili boldy.
Ákimniń málimetinshe, qazir óńirde atalǵan eldiń 91 kásiporny tirkelgen.
«Bizdiń elderimizdiń arasynda ejelden saýda-ekonomıkalyq, kóshi-qon jáne mádenı-gýmanıtarlyq salalardaǵy ózara qarym-qatynasy keń qanat jaıǵan. Mundaı seriktestik táýelsizdik jyldarynda burynǵydan da jandana tústi. Kórshi el Atyraý oblysynyń syrtqy saýda baılanysynda mańyzdy ról atqarady. Máselen ótken jyly Atyraý oblysy men Ózbekstan Respýblıkasy arasyndaǵy syrtqy saýda aınalymy 45,2 mln AQSh dollaryn qurady. Óńirdiń kóterme jáne bólshek saýda, qyzmet kórsetý, qurylys salalarynda ózbek kapıtaly bar 91 kásiporyn jumys isteıdi», -dedi Serik Shápkenov.
Bas konsýl Atabek Tursynbekovtyń aıtýynsha, Atyraýdaǵy joǵary oqý oryndarynda 200-ge jýyq ózbekstandyq jas bilim alyp jatyr.
Eske sala ketelik, budan buryn Atyraý oblysynda 80-nen astam etnostyń ókili turatynyn habarlaǵan bolatynbyz.
