Atyraý oblysynda ótken ǵasyrda salynǵan gıdrotehnıkalyq nysandar tozǵan

ATYRAÝ. QazAqparat – Atyraý oblysynda ótken ǵasyrda salynǵan gıdrotehnıkalyq nysandardyń tozýy 60 paıyzdan asqan. Bul týraly oblys ákiminiń orynbasary Qaırat Nurtaevtyń tóraǵalyǵymen tótenshe jaǵdaılardyń aldyn-alý jáne joıý jónindegi komıssııanyń otyrysynda belgili boldy, dep habarlaıdy QazAqparat oblys ákiminiń baspasóz qyzmetine silteme jasap.

Oblystyq tótenshe jaǵdaılar departamenti basshysynyń mindetin atqarýshy Nurlan Jańabaevtyń aıtýynsha, bıyl oblys aýmaǵynda sý basý qaýpi týyndamaıdy. Qazirgi jaǵdaıdy turaqty deýge bolady.

«Atyraý qalasy men aýdandar ákimdikteriniń bergen aqparattaryna sáıkes sý tasqynynyń yqtımal saldaryn joıý úshin 22,5 tonna janar-jaǵarmaı, 485 tonna ınertti materıaldar, 29 myń 800 qapshyq, 17 shatyr, 5 294 kereýet, 3 660 tósek-oryn jabdyǵy daıyndaldy. Tótenshe jaǵdaılar mınıstrliginiń nysanaly transfertteri arqyly respýblıkalyq bıýdjet esebinen tótenshe jaǵdaılardyń týyndaý táýekelin tómendetý maqsatynda 2021-2025 jyldarǵa arnalǵan «Qaýipsiz el» ulttyq jobasy iske asyrylyp jatyr. Osy joba aıasynda Mahambet aýdanyndaǵy Mahambet jáne Alǵa aýylynda tusynda Jaıyq ózeniniń jaǵalaýyn nyǵaıtý jumystary júrgizilýde. Alaıda, Alǵa aýylynda 2021 jyly reperlerdi ornatý kezinde ózen jaǵalaýynyń 15-20 metrge aýytqyǵany anyqtaldy. Sonyń saldarynan nyǵaıtý jumystary toqtatyldy. Jaıyq ózeni arnasynyń 15-30 metrge ózgerýine baılanysty jobalaý-smetalyq qujattamaǵa túzetý engizý qolǵa alyndy», -dedi Nurlan Jańabaev.

Jaıyq-Kaspıı oblysaralyq basseındik balyq sharýashylyǵy ınspektsııasy basshysynyń mindetin atqarýshy Turlan Súleımenovtiń málimetinshe, Atyraý oblysynda 31 gıdrotehnıkalyq qurylys nysany tirkelgen.

«Gıdrotehnıkalyq nysandar qurylysy ótken ǵasyrdyń 60-80 jyldary júrgizilgen. Nysandardyń naqty tozýy 60%-dan joǵary ekeni anyqtaldy. Qazir gıdrotehnıkalyq nysandardyń qaýipsizdigi men senimdiligi kúrt tómendegen. Sondyqtan gıdrotehnıkalyq qurylystardy qaýipsiz ári senimdi paıdalaný, turǵyndar ómiri men densaýlyǵyna zııan keltirýin boldyrmaý máselesi aıryqsha ózekti bolyp otyr», -dep málim etti Turlan Súleımenov.

Oblys ákiminiń orynbasary Qaırat Nurtaev Mahambet aýdanynyń Alǵa aýylynyń tusynda Jaıyq ózeniniń jaǵalaýyn nyǵaıtý jumystaryn júrgizip jatqan «Pavlodar ózen porty» AQ merdiger mekemesiniń jumysyna syn aıtty. «Alǵa aýylyndaǵy jumystardy jedeldetý qajet. Geoshpýnt qaǵyp úlgermeseńizder, eski ádispen qaptardy daıyndap, aldyn alý jumystaryn júrgizgen jón. Bıyldan bastap jaǵalaýda qorǵanysh bolmaı, ózen arnasy 13-14 metrge deıin aýytqysa, aýylǵa qaýip tóndiredi» -dedi Qaırat Nurtaev.

Eske sala ketelik, buǵan deıin Atyraýda sharýalardyń dabylynan soń kanaldarǵa tórt túlik úshin sý jiberilgenin jazǵan edik.