Atyraý oblysynda otbasylyq-dárigerlik ambýlatorııa paıdalanýǵa berildi
ATYRAÝ. QazAqparat – Atyraý oblysynda Táýelsizdik kúni qarsańynda otbasylyq-dárigerlik ambýlatorııa paıdalanýǵa berildi, dep habarlaıdy QazAqparat.
Jańa ambýlatorııa nysany Qyzylqoǵa aýdanynyń Qarabaý aýylynda salynǵan. Qazir atalǵan aýylda 1 myńnan astam adam turady. Ambýlatorııada naýqastardy tirkeý bólmesi bar. Sondaı-aq, protsedýra, salaýatty ómir salty, dárigerge deıingi qaraý, em-shara jáne egý kabınetteri jabdyqtalǵan. Munda 1 dáriger men 9 orta býyn medıtsına mamany jumys isteıdi.
«Buryn otbasylyq-dárigerlik ambýlatorııa eski ǵımaratta ornalasqan bolatyn. Bul qyzmetkerlerge de, aýyl turǵyndaryna da kóptegen qolaısyzdyq týdyrdy. Edi mine, Táýelsizdik kúni qarsańynda ambýlatorııa jańa ǵımaratqa kóshti. Muny Qarabaý aýylynyń turǵyndary úshin keremet syılyq dep esepteımiz», - deıdi Qyzylqoǵa aýdandyq aýrýhanasynyń dırektory Aınur Tilemisova.
Eske sala ketelik, buǵan deıin Atyraýda Táýelsizdik kúni qarsańynda 200 oryndyq jataqhana ashylǵan bolatyn.
