Atyraý oblysynda órtten 26 adam qutqaryldy
ATYRAÝ. QazAqparat - Atyraý oblysynda órtten 26 adam qutqaryldy, dep habarlaıdy QazAqparat tilshisi.
«Búgin túngi saǵat 01.00-de Qulsary qalasynyń № 2 mamandandyrylǵan órt sóndirý bóliminiń dıspetcherlik qyzmetine Qulsary qalasyndaǵy №35 turǵyn úıdiń terezesinen órt shyqqany jóninde qońyraý tústi. Jalyn 21 sharshy metrdi sharpyǵan. Órttiń saldarynan tútin joǵary qabattarǵa tarady. Jıyrma alty adam evakýatsııalandy, olardyń jeteýi balalar», - dep habarlady oblystyq TJD baspasóz qyzmetinen.
Qulsary qalasynyń №2 mamandandyrylǵan órt sóndirý bólimshesiniń qyzmetkerleri tilsiz jaýdy saǵat túngi 02.03-te aýyzdyqtady. Órtke 10 qyzmetker jáne 2 tehnıka jumyldyryldy.
Qurban bolǵandar men zardap shekkender joq.
