Atyraý oblysynda órtengen jataqhanadan 9 adam qutqaryldy
Oblystyq tótenshe jaǵdaılar departamentiniń qoǵammen baılanys tobynan málim etkendeı, órt týraly búgin, 21 jeltoqsanda tańerteńgi saǵat 9:28-de habar túsken.
«Qurmanǵazy aýdanyndaǵy PMK-28 aýylynyń Bolashaq kóshesinde ornalasqan eki qabatty jataqhananyń dálizinen tútin shyqqan 21 jeltoqsan kúni 09:28 saǵatta Atyraý oblysy Qurmanǵazy aýdany, PMK-28 aýyly, Bolashaq kóshesi meken jaıynda ornalasqan eki qabatty jataqhananyń dálizinen tútin shyqqan. Shaqyrtý ornyna jedel jetken órt sóndirý bólimshesiniń qyzmetkerleri jataqhananyń ekinshi qabatynyń dálizinde edenniń janǵanyn anyqtady. Órt sóndirýshiler ekinshi qabattan baspaldaq arqyly 4 balany, 3 ıindi satynyń kómegimen terezeden 5 eresek adamdy qutqaryp, qaýipsiz jerge shyǵardy. Al, 5 adam, onyń ishinde 2 bala ózderi dalaǵa shyǵyp úlgerdi», - dep habarlady departamenttiń qoǵammen baılanys toby.
Jataqhanadaǵy órt saǵat 09:54 saǵatta tolyq sóndirildi. Órtti sóndirýge Atyraý oblysy departamenttiń Qurmanǵazy aýdandyq bóliminen 7 qyzmetker men 2 tehnıka jumyldyryldy.
«Turǵyndarǵa órt kezinde tútin basqan dálizder nemese baspaldaqtar arqyly evakýatsııalaýǵa áreket jasaý qaýipti ekenin eske salamyz. Tótenshe jaǵdaıda tútin basqan bólmelerdiń tusynan ótý kezinde tynys alý joldaryn dymqyl shúberekpen jabý kerek.
Al, esiktegi jaryqshaqtardy dymqyl shúberekpen jaýyp, dymqyl kórpeni ilip qoıǵan jón. Bul is-áreket tútin ıisinen tunshyqpaýǵa kómektesedi», -dep málim etti departamenttiń qoǵammen baılanys tobynan.
Eske sala ketelik, budan buryn Atyraý oblysynda bir mezette tórt páter otqa oranǵanyn jazǵan edik.