Atyraý oblysynda órtengen 1 myńnan astam qoı úshin ótemaqy tólenbeıdi
Oblystyq Aýyl sharýashylyǵy basqarmasy basshysynyń orynbasary Azamat Aıtqalıevtiń aıtýynsha, Qurmanǵazy aýdanynda órtengen 1 myńnan astam qoıdyń jartysy et kombınatyna jóneltildi.
«Qurmanǵazy aýdanyndaǵy «Súıindik asyl tuqymdy qoı zaýyty» JShS ıeligindegi 1 myńnan astam edilbaı tuqymdy qoıdy dala órti sharpydy. Onyń ishinde 619 saýlyq, 414 qozy bolǵany anyqtaldy. Aýladaǵy 516 qoı, 1 ingen, 1 bota tolyqtaı órtenip ketken. Al 13 qoı joǵalǵan. Qazir sharýashylyqqa keltirilgen shyǵyn anyqtalyp jatyr. Biraq, seriktestik basshylary maldy saqtandyrmaǵan. Sol sebepten kásipkerge memleket tarapynan ótemaqy tólenbeıdi», - deıdi Azamat Aıtqalıev.
Onyń deregine qaraǵanda, 500-den astam qoı kórshiles Batys Qazaqstan oblysynyń Jańaqala aýdanynda ornalasqan et kombınatyna jóneltilgen. Termııalyq óńdeýden ótken soń odan et ónimderi daıyndalady.
Qurmanǵazy aýdany ákimdiginiń baspasóz qyzmetinen málim etkendeı, órt sharpyǵan jer kólemi 47 gektardy quraǵan. Dala órti Jalǵyzapan aýylynyń Asqar, Besoba, Apandykól qystaqtarynyń aýmaǵyna jaıylǵan.
Órtti sóndirýge Súıindik aýyldyq okrýginiń 30 turǵyny, Azǵyr óńirinde geologııalyq barlaý jumystaryn júrgizip jatqan «TAT Arka» JShS-nyń 10 tehnıkasy tartylǵan.
«Súıindik aýylynda órt sóndirý qyzmetiniń arnaıy jasaǵy joq. Aýyl men aýdan ortalyǵynyń araqashyqtyǵy – 270 shaqyrym. Órttiń bolǵany týraly oblystyq tótenshe jaǵdaılar departamentine habarlanbady. Batys Qazaqstan oblysynda bastalǵan órttiń kórshiles Astrahan oblysyna deıin jalǵasqany belgili boldy. Jalyn sharpyǵan jerdiń jalpy aýmaǵy – 100 gektar», - dep málim etti oblystyq Tótenshe jaǵdaılar departamentiniń memlekettik órt baqylaý basqarmasy bastyǵynyń mindetin atqarýshy Dáýren Berdenov.
Eske salaıyq, buǵan deıin Atyraý oblysynda 1 myńnan astam qoı tirideı janyp ketkenin habarlaǵan bolatynbyz.