Atyraý oblysynda órt saldarynan 6 otbasy baspanasyz qaldy
ATYRAÝ. QazAqparat - Atyraý oblysynda órt saldarynan 6 otbasy úısiz qaldy. Jergilikti atqarýshy bılik ókilderi órt kezinde zardap shekkenderge alǵashqy kómek kórsetýge barynsha kúsh salýda, dep habarlaıdy QazAqparat tilshisi.
Maqat aýdany ákiminiń apparatynan habarlaǵandaı, órt Dossor kentinde ornalasqan kópqabatty turǵyn úıdiń birinshi qabatynda keshe saǵat 15.50-de bolǵan.
«Órttiń saldarynan 6 otbasy kóshirildi. Barlyǵy - 26 adam, onyń ishinde balalar da bar. Barlyq zardap shekken otbasylar S.Sháripov atyndaǵy mektep-ınternatqa ornalastyryldy. Alaıda órt saldarynan zardap shekkender týystarynyń jáne dostarynyń úılerinde turamyz degen tilek bildirdi»,- dep habarlady aýdan ákim apparatynan.
Qazir barlyq shyǵyn kólemi naqtylanýda. Sondaı-aq, órttiń shyǵý sebebin anyqtaý jumystary júrip jatyr. Jergilikti atqarýshy organdar tarapynan zardap shekkenderdi ornalastyrý boıynsha barlyq múmkindikter qarastyrylýda. Sol sııaqty, kúıik shalǵandardy tamaqtandyrý máselesi de retimen sheshilip jatyr.
Atyraý oblysynyń TJD-nyń baspasóz qyzmetiniń habarlaýynsha, órt Maqat aýdanynyń Dossor kentindegi Aýqatov kóshesinde ornalasqan alty páterli baraq úıde boldy.
«560 sharshy metrdi jalmaǵan jalyn kelesi páterlerge taralǵan. Órt saǵat 19.54-te aýyzdyqtalyp, 22.00-de joıylǵan. Zardap shekkender joq», - dep habarlady departamenttiń taratqan habarlamasynda.
