Atyraý oblysynda óndiriste 3 jumysshy kóz jumǵan
«Oblys aýmaǵynda jumys isteıtin kásiporyndarda 38 óndiristik jazataıym oqıǵa tirkeldi. Sonyń saldarynan 16 jumysshy aýyr dene jaraqatyn aldy. Al úsh adam mert boldy. Óndiristik jazataıym oqıǵalarǵa qatysty tergeý materıaldary is júrgizý sheshimin qabyldaý úshin quqyq qorǵaý organdaryna joldandy», - dedi Atyraý oblysy Memlekettik eńbek ınspektsııasy basqarmasy basshysynyń mindetin atqarýshy Dýman Ábeýov.
Onyń aıtýynsha, jyl basynan bergi alty aıda 1075 aryz-ótinish túsken. Basqarmanyń memlekettik eńbek ınspektorlary onyń 912-sin qaraǵan.
«583 azamattyń konstıtýtsııalyq quqyqtary qorǵaldy. Basqarmada tirkelgen shaǵymdar men qabyldanǵan profılaktıkalyq baqylaý sharalary negizinde eńbek ınspektorlary tarapynan 124 tekserý júrgizildi. Tekserý qorytyndysymen eńbek zańnamasyn buzýdyń 162 deregi anyqtaldy. Kemshilikti joıý úshin 66 uıǵarym engizilip, 57 ákimshilik hattama toltyryldy. Kinálilerge 7,7 mln teńge kóleminde aıyppul salyndy. Qazir aıyppuldyń 5,7 mln teńgesi óndirildi», - dep málim etti D.Ábeýov.
Eske sala ketelik, buǵan deıin Atyraý oblysynda 61 jastaǵy jumysshy tok soǵyp, kóz jumǵanyn habarlaǵan edik. «Atyraý-Jaryq» AQ-nyń baspasóz qyzmetinen málim etkendeı, Maqat kentindegi Alash kóshesinde ornalasqan KTPG-04/6kV jabdyǵyn profılaktıkalyq synaý-tekserý júrgizilip jatqan. «Sol kezde elektr monterdi RÝ-6 kV joǵary kerneýli jelisinen tok soqqan. Monterdiń elektr qaýipsizdigi boıynsha IV razrıadty ruqsat qujaty bolǵan. Oqıǵa ornyna jedel járdem shaqyryldy. Jedel járdem brıgadasy monterdiń ólimin tirkedi», - delingen edi habarlamada.
