Atyraý oblysynda on kúnde balyq aýlaý erejesin buzǵan 74 derek tirkeldi
Oblystyq polıtsııa departamentiniń baspasóz qyzmetinen málim etkendeı, 10 qyrkúıekte «Bekire-2022» jedel-profılaktıkalyq is-sharasynyń kúzgi kezeńi bastaldy. Bul aktsııa 31 qazanǵa deıin jalǵasady.
«Atalǵan is-sharanyń alǵashqy 10 kúninde balyq qorynyń zańsyz aınalymyna baılanysty 77 quqyq buzýshylyq anyqtaldy. Onyń ishinde balyq aýlaý erejelerin buzýǵa qatysty 74, balyq jáne balyq ónimderin zańsyz tasymaldaý áketýge baılanysty 3 derek tirkeldi. Balyq qorǵaý zańdylyǵyn buzǵan 77 adam ustaldy. Olardan 199 keli balyq tárkilendi. Quqyq buzýshylardan 74 balyq aýlaý quraly alyndy», -dep habarlady departamenttiń baspasóz qyzmeti.
Al, QR Ákimshilik quqyqbuzýshylyq týraly kodeksiniń 383-babymen (Balyq aýlaý qaǵıdalaryn buzý) 74 adam ákimshilik jaýapqa tartyldy. Onyń ishinde 1 adamǵa qatysty jınaqtalǵan is qujaty sotqa jiberildi.
Sondaı-aq, Atyraý oblystyq Jaıyq-Kaspıı oblysaralyq balyq sharýashylyǵy ınspektsııasyna qara balyqtardy jáne onyń ónimderin zańsyz tasymaldaý, áketýge qatysty 3 qujat joldandy. Balyqty zańsyz tasymaljaǵan 4 adam QR Ákimshilik quqyqbuzýshylyq týraly kodeksiniń 389-babymen «Jabaıy janýarlar men ósimdikterdiń túrlerin, olardyń bólikterin nemese derıvattaryn zańsyz ıemdený, ótkizý, alyp ótý, ákelý, áketý, saqtaý, ustaý) ákimshilik jaýapkershilikke tartyldy.
Eske sala ketelik, budan buryn Zańsyz balyq aýlaǵan atyraýlyqtarǵa 15 mln teńge aıyppul salynǵanyn habarlaǵan bolatynbyz .
