Atyraý oblysynda nysandardyń jylytý maýsymyna daıyndyǵy - 72 paıyz
Atyraý oblystyq energetıka jáne turǵyn úı-kommýnaldyq sharýashylyq basqarmasy basshysynyń orynbasary Serikqalı Qanapınniń málimetinshe, qysqy maýsymǵa daıyndyqty 1 qazanǵa deıin aıaqtaý kózdelgen.
«Jylý berý maýsymyna 421 bilim berý, 147 densaýlyq saqtaý nysany men 1 789 kópqabatty turǵyn úı daıyndalyp jatyr. Qazir nysandardy jylý berý maýsymyna daıyndaý kórsetkishi 72 paıyzdy quraıdy. Máselen, Atyraý qalasyndaǵy «Bereke» jáne «Nursaıa» yqsham aýdanynda magıstraldy jylý qubyry jóndeldi. Buǵan qosa 36 shaqyrym jylý jelisi jóndelip jatyr. «Atyraý Jylý-Elektr Ortalyǵy» AQ 3 jylý agregaty men 2 týrboagregatyn qalypqa keltirý jumysyn qolǵa aldy», -dep habarlady Serikqalı Qanapın.
Onyń deregine súıensek, Atyraý qalasynnda 177 derbes jylytý qazandyǵy bar.
«Qaladaǵy turǵyn úılerge kommýnaldyq qyzmet kórsetý» JShS 12 jylý berý beketine rezerv úshin 6 jylý qazandyǵyn, 12 generator, 4 jylýalmastyrǵysh, 27 nasos qurylǵysyn satyp alǵan.
«Elektr qýatymen úzdiksiz qamtýdy júrgizý úshin «AtyraýJaryq» AQ 819 shaqyrym elektr jelisine jóndeý jumysyn júrgizip jatyr. Aldaǵy ýaqytta Atyraý qalasy men aýdandarda tozyǵy jetken elektr baǵanalaryn aýystyrý jumysy bastalady», -dep málim etti Serikqalı Qanapın.
Eske sala ketelik, buǵan deıin Atyraýdaǵy jylý jelileriniń 68 paıyzy tozǵanyn jazǵan bolatynbyz.
