Atyraý oblysynda Nurlan Ermekbaevtyń tóraǵalyǵymen óńirlerdi damytý máselesine arnalǵan keńes ótti
Bıylǵy 18 sáýirde Atyraý qalasynda Prezıdenttiń kómekshisi - Qazaqstan Respýblıkasy Qaýipsizdik Keńesiniń hatshysy N.Ermekbaevtyń tóraǵalyǵymen óńirdiń damýyna jáne qaýipsizdikke qatysty máseleler jóninde keńes ótti.
Jıynǵa Atyraý oblysynyń ákimi N.Noǵaev, ortalyq jáne jergilikti atqarýshy organdardyń, jetekshi munaıgaz kásiporyndardyń basshylary qatysty.
Keńes barysynda ulttyq qaýipsizdiktiń basym mindetterin iske asyrý aıasyndaǵy oblystyń ornyqty damýynyń ózekti máseleleri qaraldy.
Atap aıtqanda, munaı-gaz ınfraqurylymy nysandarynyń qorǵalý jaı-kúıi jáne ekologııalyq qaýipsizdiktiń túrli máseleleri talqylandy.
Balyq resýrstaryn zańsyz óndirý men kontrabandaǵa qarsy is-qımyldy kúsheıtý, sondaı-aq munaı men munaı ónimderin urlaý jáne olardyń zańsyz aınalymyn toqtatý, dinı ekstremızmniń aldyn alý máseleleri qarastyryldy.
Іs-shara nátıjesinde atalǵan máseleler boıynsha naqty usynystar aıtylyp, ortalyq jáne jergilikti atqarýshy organdarǵa tapsyrmalar berildi.