Atyraý oblysynda Nıderlandynyń 12 kompanııasy jumys isteıdi
Bul týraly Atyraý oblysynyń ákimi Mahambet Dosmuhambetovpen kezdesken Nıderlandy koroldiginiń Qazaqstan Respýblıkasyndaǵy Tótenshe jáne Ókiletti elshisi Andre Karstens málim etti.
Taraptar kezdesýde túrli saladaǵy ekijaqty yntymaqtastyq pen ınvestıtsııa tartý máselesin talqylady.
Oblys ákimi Mahambet Dosmuhambetovtiń aıtýynsha, Atyraý oblysymen syrtqy ekonomıkalyq baılanys ornatqan elderdiń qatarynda Nıderlandy koroldigi de bar.
«Bıylǵy qańtar-mamyr aılarynda Atyraý oblysynyń Nıderlandy elimen saýda aınalymy 1,28 mlrd AQSh dollaryn qurady. Atalǵan eldiń 12 kompanııasy óńirde munaı-gaz óndirýdi tehnıkalyq qoldaý, ınjenerlik qurylǵylar qurylysy, qubyr arqyly tasymaldaý, júk tasymaly sekildi salalarda belsendi qyzmet etýde. Óńir ekonomıkasyna nıderlandylyq ınvestıtsııany tartýǵa, birlesken kásiporyndar qurýǵa múmkindik mol. Ásirese, Nıderlandymen ónerkásip, munaı hımııasy, aýyl sharýashylyǵy salalarynda ekijaqty qarym-qatynasty qarqyndy damytýǵa bolady» -dedi Mahambet Dosmuhambetov.
Nıderlandy koroldiginiń Tótenshe jáne Ókiletti elshi Andre Karstens Atyraý qalasynda qurmetti konsýldyq ashý máselesin kóterdi. Bul usynys oblys ákimi Mahambet Dosmuhambetovtiń tarapynan qoldaý tapty.
Eske sala ketelik, budan buryn Atyraýda túrkııalyq ınvestor kúkirt betonıtin óndirýi múmkin ekenin habarlaǵan edik.
