Atyraý oblysynda naýqas qazasy boıynsha aıyptalǵan eki dáriger sottaldy
ATYRAÝ. QazAqparat – Atyraý oblysy Qurmanǵazy aýdandyq aýrýhanasynyń naýqasqa kómek kórsetpegeni úshin aıyptalǵan eki dárigerine qatysty qylmystyq is qaralyp, sot úkimi shyqty, dep habarlaıdy QazAqparat tilshisi.
Dárigerlerge QR Qylmystyq kodeksi 317-babynyń 3-bóligimen aıyp taǵylǵan.
«Sot talqylaýynda myna jaıttar anyqtaldy. Statsıonardyń ınfektsıonıst dárigeri Sh. jáne anestezıolog-reanımatolog dárigeri J. 2020 jyldyń 29, 30, 31 jeltoqsanynda pnevmonııa jáne qant dıabeti qosalqy aýrýy dıagnozymen aýrýhanaǵa túsken naýqas K.-ǵa tıisti medıtsınalyq kómek kórsetpegen. Dárigerlerdiń kásiptik mindetterine uqypsyz qaraýy jáne olardy tıisinshe oryndamaýy saldarynan naýqas qaıtys boldy. Sottalýshylardyń kinási jábirlenýshilerdiń, kýálardyń, sarapshylardyń aıǵaqtarymen, komıssııalyq sot-medıtsınalyq saraptamanyń qorytyndysymen óz dálelin tapty», - dep málimdedi Qurmanǵazy aýdandyq sotynyń baspasóz qyzmetinen.
Prokýror eki sottalýshyǵa dárigerlik qyzmetpen aınalysý quqyǵynan 3 jyl, bas bostandyǵynan 2 jyl 6 aı merzimge aıyrý túrindegi jaza taǵaıyndaýdy, sondaı-aq sottalýshylar onsha aýyr emes qylmys jasaǵandyqtan, olardy raqymshylyq aktisi boıynsha negizgi jazadan bosatýdy surady.
Sot jazany jeńildetetin mán-jaılar retinde olardyń buryn sotty bolmaǵanyn, sottalýshy Sh.-nyń jas balalary baryn eskerdi.
«Sottalýshylardyń árqaısysynyń rólin jáne jábirlenýshilerdiń pikirin eskere otyryp, sot Sh.-ǵa 2 jyl 6 aı merzimge bas bostandyǵynan aıyrý túrindegi negizgi jazany, sondaı-aq 3 jylǵa dárigerlik qyzmetpen aınalysý quqyǵynan aıyrý túrindegi qosymsha jazany taǵaıyndady. J.-ǵa 2 jyl 6 aı merzimge dárigerlik qyzmetpen aınalysý quqyǵynan aıyra otyryp, 2 jyl merzimge bas bostandyǵynan aıyrý jazasyn taǵaıyndady. Qylmystyq kodekske sáıkes Sh. jáne J.-nyń áreketteri onsha aýyr emes qylmystarǵa jatatyndyqtan, «Qazaqstan Respýblıkasy Táýelsizdiginiń 30 jyldyǵyna baılanysty raqymshylyq jasaý týraly» Zańǵa sáıkes olar bas bostandyǵynan aıyrý túrindegi negizgi jazadan bosatyldy. Sottalǵandardan jábirlenýshilerdiń paıdasyna 8 mln teńge moraldyq zalal ótemaqysy óndirildi», - dep málim etti aýdandyq sottyń baspasóz qyzmetinen.
Sot úkimi zańdy kúshine engen joq.
Eske sala ketelik, buǵan deıin Atyraýda aýrýhana dırektory sottalyp, aýyl ákimi úıqamaqqa alynǵanyn habarlaǵan edik.
