Atyraý oblysynda múıizin kesip ketken 10 kıiktiń denesi tabyldy
ATYRAÝ. QazAqparat - Atyraý oblysynda atyp ketken 10 kıiktiń denesi tabyldy, dep habarlaıdy QazAqparat.
«Tuıaqty jabaıy ańdardy jáne kıikterdi qorǵaý aıasynda júrgizilgen shara barysynda 10 kıiktiń denesi tabyldy. Olardy Atyraý oblysy Mahambet aýdanynda «Ohotzooprom» ÓB» respýblıkalyq memlekettik qazynalyq kásiporny Batys Qazaqstan oblysyndaǵy fılıalynyń jedel áreket etý toby ınspektorlary tapqan. Bókenderdiń bárin bireýler atyp alyp, keıin múıizin kesip áketken», - dep habarlaıdy «Ohotzooprom» ÓB» RMQK.
Óńirlik polıtsııa departamentiniń málimetinshe, oqıǵa ornyna Mahambet aýdany AІІB jedel tergeý toby jiberilgen. Fakt Mahambet aýdany AІІB-e tirkelgen.
Aıta keteıik, qańtar aıynyń 14-i kúni Qaraǵandy oblysynda brakonerler «Ohotzooprom» ınspektoryn óltirip ketken bolatyn.
Ol joly da «Ohotzooprom» ÓB» RMQK ınspektorlary Qaraǵandy oblysynyń Nura aýdanynyń aýmaǵyna reıd júrgizý barysynda atyp alynǵan 5 kıikti tapqan. Kıikti atqan adamdardyń izine túsken ınspektorlar memlekettik tirkeý nómiri joq eki kólikti qýyp, onyń birin toqtatqan. Avtomobıldi tekserý barysynda olar qarsylyq kórsetken. Sonyń saldarynan bir ınspektordyń jaǵy synyp, pyshaq jaraqatyn alsa, ekinshi ınspektordyń mıy shaıqalyp, es-túsinen aıyryldy. Keıin ol Astana qalalyq №1 aýrýhanasynda jan tapsyrdy.
21 qańtar kúni Qylmystyq polıtsııa departamenti qyzmetkerleriniń Qyzylorda oblysyndaǵy arnaıy operatsııasynyń nátıjesinde jeke úılerdiń birinen «Ohotzooprom» ÓB» RMQK ınspektory Nurǵalıev Erlan Balǵabekulynyń óltirilýine qatysty úsh kúdikti ustaldy. Qazirgi ýaqytta tergeý amaldary júrgizilip jatyr. Kúdiktilerdiń úsheýi de ýaqytsha oqshaýlaǵyshqa qamalǵan. Sotqa deıingi tergeý amaldary jalǵasýda.
