Atyraý oblysynda munaıǵa uqsas suıyqtyq tógilgen jer tabyldy
Bul týraly WhatsApp messendjeri men áleýmettik jelide vıdeo tarady.
Vıdeo avtorynyń aıtýynsha, Mahambet aýdanynda munaıǵa uqsas suıyqtyq tógilgen jer tabylǵan.
«Atyraý oblysynyń bas ekologyna, ekologııa janashyrlaryna qulaqqaǵys. Mahambet aýdanyndaǵy Sary, Óskenbaı degen jerdiń mańynda munaı ózdiginen shyǵyp jatyr. Budan malymyzǵa qaýip tónedi. Buǵan malymyz qulasa, óledi. Dalaǵa úlken kólemde munaı tógilip jatyr. Shara qoldanyńyzdar», -deıdi vıdeo avtory.
Oblys ákiminiń orynbasary Jasulan Bısembıev QazAqparat tilshisine málim etkendeı, tógilgen suıyqtyq jaıynda oblystyq tabıǵı resýrstar basqarmasy men ekologııa departamentine habar berilgen.
Bir top mamandar shopan kórsetken jerge attandy. Olar dalaǵa ne tógilgenin anyqtaý úshin synama alady.
Mamandardyń saparynyń qorytyndysy týraly aqparat keıinirek jarııalanady.
Eske sala ketelik, budan buryn Atyraý oblysynda las sýdan kól jasaǵan kásiporynǵa 10 mln teńge aıyppul salynǵanyn habarlaǵan bolatynbyz.
Atyraý oblystyq ekologııa departamentiniń basshysy Álibek Bekmuhametovtiń málimetinshe, arnaıy ekonomıkalyq aımaqta ornalasqan kásiporyn las sýdy dalaǵa tógip, sonyń saldarynan jasandy kól túzilgen.
«Áleýmettik jelide atalǵan seriktestiktiń jer astyna kómilgen qubyrdan quramy belgisiz las sýdy jer betine ruqsatsyz tókkeni týraly beınejazbalar jarııalanǵan. Osylaısha, «Karabatan Utility Solutions» JShS tarapynan ekologııalyq zańnama talaby buzylǵan. Osyǵan baılanysty departament qyzmetkerleri jospardan tys tekseris júrgizdi. Tekserý qorytyndysymen kórsetilgen derekter rastaldy. Qazir seriktestikke qatysty zań buzýshylyq faktisi boıynsha ákimshilik is qozǵaldy. QR Ákimshilik quqyq buzýshylyq týraly týraly kodeksi 328-babynyń 1-tarmaǵymen qorshaǵan ortaǵa emıssııalardyń normatıvterin asyrǵany úshin ákimshilik jazaǵa tartylyp, 10 mln 448 myń teńge aıyppul salyndy», - dep habarlady Álibek Bekmuhametov.
