Atyraý oblysynda munaıǵa uqsas suıyqtyq aǵyp jatqan aýmaq qorshaldy
Oblystyq ekologııa departamentiniń baspasóz qyzmetinen málim etkendeı, munaı tógilgen Mahambet aýdanyndaǵy Esbol aýyldyq okrýginen 40 shaqyrym qashyqtyqta anyqtalǵan.
«Mahambet aýdanyna qarasty Sary Óskembaı ýchaskesindegi K-3 krelıýstik uńǵymadan maı aǵyp jatqan aýmaǵy tolyqtaı qorshaldy. Aldaǵy ýaqytta atqarylar jumystyń bári departament qyzmetkerleriniń baqylaýynda bolady», -dep habarlady departamenttiń baspasóz qyzmeti.
Budan buryn áleýmettik jeli qoldanýshysy Atyraý oblysynda munaıǵa uqsas suıyqtyq tógilgen jer tabylǵany týraly týraly vıdeo júktegen edi.
«Atyraý oblysynyń bas ekologyna, ekologııa janashyrlaryna qulaqqaǵys. Mahambet aýdanyndaǵy Sary, Óskenbaı degen jerdiń mańynda munaı ózdiginen shyǵyp jatyr. Budan malymyzǵa qaýip tónedi. Buǵan malymyz qulasa, óledi. Dalaǵa úlken kólemde munaı tógilip jatyr. Shara qoldanyńyzdar», -deıdi vıdeo avtory.
Keıin Atyraýda munaıǵa uqsas suıyqtyq tógilgen jer eki jyldan beri tazalanbaǵanyn jazǵan bolatynbyz.
Ekologııa departament tarapynan lastanǵan aýmaqty tazalaý týraly Mahambet aýdanynyń ákimine 2021 jylǵy 9 qarashada, keıin qaıtadan 2022 jylǵy 7 maýsymda hat joldanǵan. Byltyrǵy 20 jeltoqsanda Atyraý oblysynyń ákimine hat jiberilgen.
«2021 jylǵy 13 tamyzda lastanǵan jerge ólshem júrgizildi. Lastanǵan jáne fondyq topyraqtan alynǵan synama nátıjesinde topyraq quramynda munaı ónimderi kóp mólsherde ekeni anyqtaldy. «Batysqazjerqoınaýy» Batys Qazaqstan geologııa jáne jer qoınaýyn paıdalaný óńiraralyq departamentiniń málimetinshe, bul aýmaqta Ońtústik Baımenke K-3 krelıýstik uńǵyma ornalasqan. Alaıda, uńǵyma jer qoınaýyn paıdalanýshyǵa berilmegen. Jer de, uńǵyma da memleket menshiginde», -dep habarlaǵan edi departamenttiń baspasóz qyzmeti.