Atyraý oblysynda múgedektigi bar 300-ge jýyq adam jumyspen qamtylǵan
Oblystyq jumyspen qamtýdy úılestirý jáne áleýmettik baǵdarlamalar basqarmasynyń bólim basshysy Gúlbolat Amanǵalıevanyń málimetinshe, jumyspen qamtý ortalyqtaryna múgedektigi bar 485 adam júgingen.
«Jyl basynan beri 407 adamǵa áleýmettik qoldaý túrleri kórsetildi. Al, 293 adam jumysqa ornalasty. Óıtkeni, Atyraý qalasy men barlyq aýdanda múgedektigi bar adamdardy jumyspen qamtý baǵytynda arnaıy qaýly qabyldanǵan edi. Osy qaýlyǵa sáıkes mekemede jumys isteıtin adamnyń sanyna baılanysty múgedekter úshin 2-4 paıyz kóleminde kvota bólý kózdelgen. Qazir múgedektigi bar adamdardy jumyspen qamtı alatyn mekemeler tizimi bekitildi. Mekemelerdiń basshylaryna jumyspen qamtý erejesi túsindirildi. Sonyń nátıjesinde jyl basynan beri kvotamen 8 adam jumysqa ornalasty. Al, qaýlyny oryndamaı otyrǵan, ıaǵnı múgedektigi bar azamattar úshin kvota bólmegen mekemelerdiń tizimi tıisti organdarǵa joldandy», - deıdi Gúlbolat Amanǵalıeva.
Onyń aıtýynsha, jyl basyna beri múgedektigi bar adamdardy jumyspen qamtý sharalary aıasynda 105 adam qysqa merzimdi oqý kýrstaryna jiberilgen. Sondaı-aq, bıyl múgedektigi bar 9 adamǵa 400 aılyq eseptik kórsetkish mólsherinde memlekettik grant berilgen. Qazir olar jeke kásibin júrgize bastady.
Eske sala ketelik, budan buryn Atyraýda múgedektigi bar adamdardy ońaltýǵa arnalǵan ortalyqqa jańa jabdyqtar alynǵanyn habarlaǵan bolatynbyz.
