Atyraý oblysynda memlekettik aýdıtten keıin birneshe sheneýnik jazaǵa tartyldy
«Memlekettik aýdıt jumysynyń qorytyndysy boıynsha respýblıkalyq bıýdjettiń qarajatyn ıgerýde jalpy somasy 498 mln teńge boıynsha kemshilikter, protsedýralyq sıpatta 108 buzýshylyqtyń bary anyqtalǵan. Aýdıttiń qorytyndysy boıynsha oblys ákimdigi kelesi joly kemshilikterge jol berilmes úshin kelesi sharalar qabyldandy. Naqtyraq aıtqanda, oblystyq aýyl sharýashylyǵy boıynsha ótelýi tıis 40 mln teńgeniń 17 mıllıony qaıtaryldy. Qalǵan soma boıynsha keste bekitilip, jyldyń sońyna deıin qarajat 100 paıyz qaıtarylady. Bul jerde buzýshylyqtardyń 22 pýnkti boıynsha túsindirý keńesteri júrgizildi. Aıta keterligi, oblys ákiminiń orynbasary men aýyl sharýashylyǵy basqarmasy basshysynyń jumystary komıssııada qaraldy, qazirgi tańda ekeýi de memlekettik qyzmette jumys istemeıdi. Olar tekseriske deıin óz ótinishteri boıynsha jumystan shyǵyp ketti», - dedi Serik Shapkenov Esep komıtetiniń kezekti otyrysynda.
Onyń aıtýynsha, qalǵan salalar boıynsha kemshilikterge jol bergen qyzmetkerler jazalanǵan. Aýdıt jumysynyń qorytyndysy boıynsha jańa komıssııa qurylyp, túsindirý jumystary júrgizilgen.
«Densaýlyq saqtaý salasy boıynsha ótelýi tıis 3 mln teńge tólendi. «Eskertý» túrinde vaktsınalar qoımasynyń jetekshisi tártiptik jazaǵa tartyldy. Aldaǵy ýaqytta mundaı kemshilikterge jol bermeý úshin vaktsınalar boıynsha arnaıy komıssııa quryldy. Vaktsınalarǵa qatysty shaǵymdar kóp edi. Osydan bylaı arnaıy komıssııa salany qatań baqylaýǵa alady. Qalalyq №1 emhana týraly aıtar bolsaq, ol jerde 32 mıllıon teńge tolyǵymen qalpyna keltirildi, tólendi. Tıimsiz shyǵyndarǵa baılanysty qyzmetkerler tártiptik jazaǵa tartyldy», - deıdi Serik Shapkenov.
Atyraý oblysy ákiminiń birinshi orynbasary qurylys salasyndaǵy kemshilikter boıynsha júıeli jumystar júrgizilip, shyndyqqa sáıkes kelmeıtin esep bergen jaýaptylardyń isi qolǵa alynǵanyn aıtty. Jol qurylysyndaǵy kemshilikterdi eńserý úshin de oblysta arnaıy komıssııa qurylǵan.
Eske sala ketsek, búgin Esep komıtetiniń kezekti otyrysynda Atyraý oblysyna bólingen respýblıkalyq bıýdjet qarajatynyń paıdalanylýyna júrgizilgen memlekettik aýdıttiń qorytyndylary jarııalanǵan bolatyn. Otyrysta Esep komıtetiniń múshesi Talǵat Jaqan baıandama jasap, atalmysh óńirde respýblıkalyq bıýdjettiń atqarylýyndaǵy birqatar kemshilikterdi ataǵan edi.
