Atyraý oblysynda memleket ıeligine 210 myń gektar jer qaıtarylady
Jer resýrstaryn basqarý komıteti Atyraý oblysy boıynsha departamentiniń basshysy Gúlzııa Qurmanovanyń málimetinshe, jer ýchaskesin nysanaly maqsatqa saı ıgermegenderge 21 nusqama berilgen. Al Jer kodeksiniń talaptaryn saqtamaǵan, jer ýchaskelerin zańǵa qaıshy paıdalanǵandarǵa 18 nusqama joldandy.
«Prezıdenttiń aýylsharýashylyq maqsatyna berilip, ıgerilmeı otyrǵan jer ýchaskelerin memleketke qaıtarý tapsyrmasyna sáıkes, ótken jyly 200 myń gektar jer ýchaskesin qaıtarý kózdelgen edi. Byltyr barlyǵy 185 jer ýchaskesi qaıtaryldy.
Jer teliminiń jalpy kólemi 206 myń 209,90 gektardy quraıdy. Onyń ishinde egistik alqabyna 15 416 gektar jer ýchaskesi, jaıylymdyq maqsatta paıdalaný 190693,90 gektar berilgen. Al 100 gektar basqa maqsattaǵy jumystar úshin berilgeni anyqtaldy.
Bıyl oblys boıynsha 210 myń gektar aýyl sharýashylyǵy maqsatyndaǵy jer ýchaskesin memleketke qaıtarý josparlanyp otyr», - deıdi Gúlzııa Qurmanova.
Onyń aıtýynsha, oblys aýmaǵynda osy kezge deıin 56 jer ýchaskesi qaıtarylǵan. Jer teliminiń jalpy kólemi 17296,20 gektardy quraıdy. Onyń ishinde 40 gektar egistik alqaby, 16864,95 gektar jaıylymdyq, 391,25 gektar basqa maqsattaǵy jer ýchaskeleri bar.
Eske sala ketelik, budan buryn Atyraý oblysynda 165 myńǵa jýyq gektar jer memleket menshigine qaıtarylǵanyn habarlaǵan bolatynbyz.
