Atyraý oblysynda memqyzmetterdiń sapasyna monıtorıng júrgizildi

ATYRAÝ. QazAqparat - Sybaılas jemqorlyqqa qarsy strategııasyn júzege asyrý boıynsha sybaılas jemqorlyq táýekelderin syrtqy taldaý men baǵalaýdy iske asyrý jónindegi Respýblıkalyq arnaıy monıtorıngtik top músheleri Aıgúl Soloveva, YrzaTursynzada jáne Memlekettik qyzmet isteri jáne sybaılas jemqorlyqqa qarsy is-qımyl agenttiginiń ókilderi Arman Berdalın, Ravıl Tólebaev, Aıbol Qozbaǵarov jumys tobymen Atyraý oblysynda boldy, dep habarlaıdy QazAqparat tilshisi.

Olar «Halyqqa qyzmet kórsetý ortalyǵy» men birqatar memlekettik organdardyń halyqqa kórsetetin qyzmetteriniń sapasyn tekserdi.  Sonymen qatar, aýdan aktıvterimen kezdesýler jáne sybaılas jemqorlyqqa qarsy mádenıetti qalyptastyrýǵa baǵyttalǵan is-sharalar ótkizdi.

Jumys toby alǵashqy kúnderi Atyraý oblysy Jylyoı aýdanynyń Jumyspen qamtý ortalyǵyn, Mahambet aýdanynyń halyqqa qyzmet kórsetý ortalyǵynyń, Inder aýdanynyń ortalyq emhanasynyń qyzmetimen tanysty jáne memlekettik qyzmetterdiń sapasyna monıtorıng júrgizip, turǵyndardyń qyzmetter sapasy týraly pikirlerin tyńdady.

Sondaı-aq oblystyń barlyq memlekettik organy basshylary jáne qala, aýdan ákimderi, ádep jónindegi ýákilderiniń, kvazımemlekettik sektor sýbektileri, úkimettik emes uıym ókilderiniń qatysýymen kezdesý ótti. Onda jergilikti memlekettik organdardyń sybaılas jemqorlyqtyń aldyn alý men memlekettik qyzmet kórsetý sapasyna qatysty arnaıy monıtorıngtik toptyń jumys qorytyndysy talqylandy.

 Atyraý oblysy boıynsha arnaıy monıtorıngtik toptyń jetekshisi Amangeldi Abdolovtyń aıtýynsha, josparǵa sáıkes 3 memlekettik organda jáne 1 kvazımemlekettik sektorda sybaılas jemqorlyq táýekelderine syrtqy taldaý júrgizilip, nátıjesinde barlyǵy «135» kemshilikter tabyldy. Onyń ishinde, memlekettik qyzmet kórsetý baǵyty boıynsha, normatıvtik quqyqtyq aktilerinde qarama-qaıshylyqtar jáne ákimshilik kedergiler anyqtalyp, olardy joıý boıynsha «38» usynys berildi, búgingi kúnge deıin barlyq usynystar oryndalǵan.

Bulardan bólek, Atyraý oblysynyń memlekettik kirister departamentinde, Halyqqa qyzmet kórsetý ortalyǵynda, 7-shi emhanada jáne Іshki ister departamentinde monıtorıng jumystarynyń ótkizilgendigin atap ótý kerek.

Aıtylǵandarǵa qosa, Bilim berý salasynda sybaılas jemqorlyqqa qarsy mádenıetti qalyptastyrý maqsatynda Atyraý oblysy «Atyraýmunaı-gaz» ýnıversıtetiniń stýdentterimen erkin formatta pikirtalas ótti. Pikirtalas barysynda stýdentter tarapynan «Qoǵamdaǵy sybaılas jemqorlyq deńgeıi qandaı?, Sybaılas jemqorlyqqa qarsy is-sharalar nátıje berip jatyr ma? Para alǵan jáne bergen adam birdeı jazalana ma? degen jáne basqa da  suraqtar qoıylyp, olarǵa Agenttik ókili Arman Berdalın jan-jaqty jaýap berdi.

Sapar sońynda respýblıkalyq arnaıy monıtorıng top músheleri men Agenttik ókilderi Atyraý oblysynyń memlekettik organdaryndaǵy qyzmet kórsetý sapasyn oń baǵalap, anyqtalǵan kemshilikterdi joıý jóninde tapsyrma berdi.

Abaı Aqmurzıev