Atyraý oblysynda medıtsına salasyna 207 maman jetispeıdi
ATYRAÝ. QazAqparat – Atyraý oblysynyń ákimi Mahambet Dosmuhambetov densaýlyq salasyna qatysty otyrysta emhanalar men aýrýhanalardyń basshylary jumysty tıisti deńgeıde uıymdastyra almaı otyrǵanyn synap, isti jandandyrýǵa tapsyrma berdi, dep habarlaıdy QazAqparat.
Oblys ákimi birinshi kezekte turǵyndarǵa sapaly qyzmet kórsetý qajettigin, keıbir medıtsınalyq mekemede bul másele syn kótermeıtinine toqtaldy.
«109 biryńǵaı baılanys ortalyǵyna medıtsınalyq mekemelerdiń jumysyna turǵyndardyń kóńili tolmaıtyny jóninde shaǵym jıi túsedi. Ásirese, medıtsınalyq qyzmettiń sapasyna, mamandardyń deńgeıi men etıkasyna qatysty shaǵym óte kóp. Demek, bul emhana men aýrýhanalar basshylarynyń jumysty tıisti deńgeıde uıymdastyra almaı otyrǵanyn kórsetedi», - dedi Mahambet Dosmuhambetov.
Ákimniń aıtýynsha, medıtsına salasyna barlyq jaǵdaı jasalǵan. Memleket tarapynan qoldaý kúsheıip, qyzmetkerlerdiń eńbekaqysy ósken. Eger medıtsınalyq mekeme basshylary jumysty durys uıymdastyrmasa, qatań shara qoldaný kerek.
Al, oblystyq densaýlyq saqtaý basqarmasynyń basshysy Ashan Baıdýálıevtiń sózinshe, kemshilikter men olqylyqtardy joıýǵa bolady. Alaıda salada mamandar tapshylyǵy týyndap otyr.
«Máselen, ótken jyly 278 dáriger jetispegen edi. Byltyr 93 dáriger jumysqa qabyldandy. Alaıda, oblystyń medıtsına salasyna áli de 207 maman jetispeıdi. Bıyl bul máseleni granttar bólý arqyly birtindep sheshýdi josparlap otyrmyz», - dedi A.Baıdýálıev.
Eske sala ketelik, budan buryn Atyraý oblysynda 278 medıtsına mamany jetispeıtinin habarlaǵan bolatynbyz.
