Atyraý oblysynda medıtsına mekemelerine ottegi júıesi tartylyp jatyr
ATYRAÝ. QazAqparat - Qazirgi ýaqytta óńirdegi medıtsınalyq mekemeler 25 ottegi kontsentratorymen qamtamasyz etilgen, búgin taǵy 5 qurylǵy keledi, dep habarlaıdy Atyraý oblystyq kommýnıkatsııalar qyzmeti.
Bul týraly oblystyq densaýlyq saqtaý basqarmasynyń basshysy Nurlybek Qabdyqaparov málimdedi.
- Búginde provızorlyq jáne barlyq statsıonarlarǵa ottegi kontsentratorlary qoıylýda. Bul arqyly kıslorodtyq ballondar sany azaıatyn bolady. Osynyń aıasynda jańa ǵımrataqa ottegi júıesin tartyp jatyrmyz. Atalǵan jumys tamyz aıynyń basynda bitýi kerek, - dep túsindirdi oblystyq densaýlyq saqtaý basqarmasynyń basshysy Nurlybek Qabdyqaparov.
Atyraý oblystyq aýrýhanasynyń bas dárigeri Erbol Imanǵalıevtiń aıtýynsha, ottegi kontsentratorlaryn qoldaný dárigerlerdiń jumysyn aıtarlyqtaı jeńildetedi.
Óıtkeni, budan buryn qoldanysta bolǵan kıslorodty ballondar yńǵaısyz bolatyn. Ballondar aýyr jáne ottegini únemi toltyryp turý qajet.
- Qazirgi ýaqytta biz kólemi 5 lıtr ottegi kontsentratorlaryn qoldanyp jatyrmyz. Sáıkesinshe, ottegi ballondarynyń sanyn azaıtamyz, - dedi Erbol Imanǵalıev.
