Atyraý oblysynda máslıhat depýtattyǵyna talasatyn úmitkerlerdiń 21 paıyzy - áıelder
ATYRAÝ. QazAqparat – Atyraý oblysynda máslıhattardyń bir mandattyq 125 okrýgine 383 kandıdat tirkeldi, dep habarlaıdy QazAqparat tilshisi.
Atyraý oblystyq aýmaqtyq saılaý komıssııasynyń málimetinshe, máslıhattyń bir mandattyq 125 okrýgine 408 kandıdat usynylǵan.
Onyń ishinde 383 kandıdat tirkelgen.
«Oblystyq máslıhat depýtattaryn saılaýǵa 6 partııa usynǵan tizimmen 66 kandıdat tirkelip otyr. Barlyq deńgeıdegi máslıhat depýtattaryn saılaý jónindegi bir mandattyq 125 aýmaqtyq saılaý okrýgine 408 kandıdat usynyp, onyń 383-i (93,87%) tirkeýden ótti. Usynylǵan 408 kandıdattyń 13-i jeke ótinishi negizinde tirkeýden alynyp tastaldy. Al 12 kandıdatqa búkil qujattardy usynbaýyna baılanysty tirkeýden bas tartyldy», -dep habarlady aýmaqtyq saılaý komıssııasynan.
Ortasha alǵanda bir mandatqa 3 kandıdattan keledi. Tirkelgen kandıdattardyń arasynda 300 (78,3%) er, 83 (21,7%) áıel bar.
«Bıylǵy 19 naýryzda ótetin Májilis jáne máslıhat saılaýynda Atyraý oblysyndaǵy 9 máslıhatqa 140 depýtat saılanýy kerek. Onyń ishinde 30-y oblystyq máslıhatqa, 25-i qalalyq máslıhatqa, 85-i aýdandyq máslıhat depýtaty atanady. Oblystyq máslıhatqa 30 depýtattyń 15-i (50%) partııa tizimi boıynsha saılanady», -dep málim etti aýmaqtyq saılaý komıssııasynan.
Eske sala ketelik, budan buryn Atyraý oblysynda Májilis depýtattyǵyna 13 kandıdat talasatynyn habarlaǵan edik.
Parlament Májilisiniń depýtatyn saılaý boıynsha №13 birmandatty aýmaqtyq saılaý okrýgine usynylǵan 20 kandıdattyń 13-i nemese 65% tirkelgen.
Onyń 10-y (77%) ózin-ózi usynsa, úsh partııa usynǵan 3 (23%) kandıdat tirkelip otyr. Kandıdattardyń arasynda jeteýi (53,84%) er adam, altaýy (46,16%) áıel.
Bir kandıdattyń zań talaptaryna sáıkes kelmegeni anyqtaldy. Onyń ótelmegen nemese alynbaǵan sottylyǵy bar.
Sondaı-aq saılaý komıssııasyna kózdelgen barlyq qujatty usynbaýyna baılanysty 6 kandıdatty tirkeýden bas tartylǵan.
