Atyraý oblysynda mal baǵýǵa shyqqan er adam joǵalyp ketti
ATYRAÝ. QazAqparat – Atyraý oblysynda mal baǵýǵa shyǵyp, joǵalyp ketken er adam izdestirilip jatyr, dep habarlaıdy QazAqparat tilshisi.
Oblystyq tótenshe jaǵdaılar departamenti qoǵammen baılanys tobynyń málimetinshe, ol keshe mal jaıýǵa shyqqan. Onyń mal jaıatyn órisi aýdan ortalyǵy – Qulsary qalasynan qaı baǵytta ekeni naqtylanbaǵan.
«Jylyoı aýdany turǵynynyń 9 mamyrda saǵat 8:00-de óriske mal aıdap shyqqany anyqtaldy. Biraq, sodan beri odan esh habar bolmaǵan. Osy ýaqytqa deıin turatyn jerine qaıta oralmaǵan», - dep habarlady departamenttiń qoǵammen baılanys toby.
Bir kún buryn mal jaıýǵa shyǵyp, habar-osharsyz ketken er adamnyń jasy 30-da. Ázirge onyń joǵalyp ketýine ne sebep bolǵany belgisiz kúıde qalyp otyr.
Joǵalǵan malshyny izdestirý búgin, 10 mamyrda jergilikti ýaqytpen saǵat 11:15-te bastaldy. Іzdestirý jumystary Jylyoı aýdanynyń aýmaǵyndaǵy jazyq dalada júrip jatyr.
Oǵan oblystyq tótenshe jaǵdaılar departametinen 6 qyzmetker, 1 qyzmettik ıt, týystarynan 4 adam, ÓKM-nen 1 qyzmetker tartyldy. Sondaı-aq, «Qazavıaqutqarý» AQ-nyń «Mı-8MTV UPMI844» tikushaǵymen Qulsary qalasynan 150 shaqyrym radıýsta áýeden barlaý júrgizý qolǵa alyndy. Tikushaqtyń ekıpaj quramynda 5 adam bar.
Eske sala ketelik, buǵan deıin Atyraý oblysynda joǵalyp ketken 11 adam izdestirilip jatqanyn, keıin olar aman-esen tabylǵanyn jazǵan edik.
