Atyraý oblysynda qyzylsha juqtyrýdyń 269 deregi tirkeldi
Atyraý oblystyq sanıtarııalyq-epıdemııalogııalyq baqylaý departamentiniń bólim basshysy Aınagúl Sársenǵalıevanyń málimetinshe, 2 naýryzdan 7 qyrkúıekke deıin qyzylsha juqtyrý kúdigimen 372 jaǵdaı anyqtalǵan.
«Mundaı derektiń deni Atyraý qalasynda baıqalyp otyr. Qala turǵyndarynan 337, Jylyoı aýdanynda 16, Qurmanǵazyda – 7, Mahambette – 6, Isataı, Qyzylqoǵa, Inder aýdandarynda 2 jaǵdaı anyqtaldy. Zerthanalyq taldaý qorytyndysymen qyzylsha juqtyrýdyń 269 deregi tirkeldi. Qyzylsha ınfektsııasynyń aldyn alýǵa baǵyttalǵan kúrestiń jalǵyz ári tıimdi sharasy – vaktsına saldyrý», - deıdi Aınagúl Sársenǵalıeva.
Onyń aıtýynsha, balalardy qyzylshaǵa qarsy vaktsınatsııalaý qyzylsha, qyzamyq jáne epıdemııalyq parotıtke qarsy biriktirilgen vaktsına egý arqyly júzege asyrylady.
«Bul vaktsına Dúnıejúzilik densaýlyq saqtaý uıymy tarapynan sertıfıkattalǵan. Vaktsınany Ulttyq egý kúntizbesine sáıkes 12-15 aılyq kezde, ári qaraı revaktsınatsııalaý 6 jasta júrgiziledi. Osy kezge deıin 9 649 adam qyzylshaǵa qarsy vaktsına saldyrdy», -dep málim etti Aınagúl Sársenǵalıeva.
Eske sala ketelik, budan buryn Atyraý oblysynda 5 aıda qyzylsha juqtyrýdyń 202 deregi tirkelgenin jazǵan bolatynbyz.
Atyraý oblysynda bıylǵy naýryz aıynda atalǵan aýrýdyń 4 jaǵdaıy tirkelgen. Alǵashqy jaǵdaı shet elden kelgen jasóspirimnen anyqtalǵan. Túrkııa elinen kelgen azamattyń balasy vırýsty sol jaqtan juqtyryp kelgen. Al, bes aıda osyndaı 202 derek tirkelgen.
