Atyraý oblysynda qysqartylǵan munaıshylar TShO-ǵa jumysqa turǵyzylady

ASTANA. QazAqparat - Atyraý oblysynda qysqartylǵan munaıshylar «Teńiz Shevroıl» kompanııasynda jańadan ashylǵan jumys oryndaryna shaqyralady. Bul týraly búgin QR Úkimetiniń otyrysynan keıin ótken brıfıngte QR Densaýlyq saqtaý mınıstri Tamara Dúısenova málim etti.

«Qazaqstanda qazirgi ýaqytta 1 myńnan astam munaı-servıstik kompanııalar bar. Olar negizinen 5 oblysta shoǵyrlanǵan. Munaı baǵasynyń tómendeýine baılanysty, olardyń 99-ynda jumys oryndaryn saqtap qalý boıynsha problemalar týyndap qalýy múmkin. Bular boıynsha, 3 topty anyqtadyq. Birinshisi, jumystan aıyrylǵan 1 279 qyzmetker boıynsha, biz jumystardy aıaqtap qaldyq. Qazirgi ýaqytta jumysqa ornalastyrylmaǵan 500 adam qaldy. Árbir azamatty jumysqa ornalastyrý sharasy jeke júrgizilýde. Atyraý oblysynda 3 800 adam jumystan aıyrylýy yqtımal. Olar boıynsha, eki tetik jasaqtaldy. «Teńiz Shevroıl» kompanııasynyń bolashaqta keńeıtilýine baılanysty 20 myń jańa jumys orny ashylady. Bul kompanııa atalmysh jumysty bastap ketken bolatyn. Bıyl Atyraý, Mańǵystaý oblystarynda jańa jumys oryndarynyń alǵashqy legi ashyla bastady», - dedi mınıstr. 

Onyń aıtýynsha, eger TShO jobasy baıaýlaıtyn bolsa, QR ÚIIDMB, «Bıznestiń jol kartasy-2020», «Agrobıznes-2020» baǵdarlamalary aıasynda anyqtalǵan qajetti mamandyqtar men jumys oryndaryna jiberiledi.

«Barlyq mamandardy ornalastyramyz dep aıta almaımyn, sebebi jumys berýshiniń talabyna saı mamandar bolady, keıbiri talapqa kelmeı qalady, sondyqtan biz olardy «Jumyspen qamtýdyń jol kartasy» sheńberinde  qaıta oqytyp, shaǵyn bıznes ashýlaryna mıkrokredıtter usynamyz. Bul azamattarǵa memleket tarapynan qoldaý kórsetilip otyrady», - dedi T. Dúısenova.