Atyraý oblysynda qylmys deńgeıi 38 paıyzǵa tómendegen

Bul týraly Atyraý oblysynyń ákimi Mahambet Dosmuhambetov ótken jyly atqarylǵan jumystardyń esebin berý kezinde aıtty dep habarlaıdy QazAqparat Atyraý oblystyq óńirlik kommýnıkatsııalar qyzmetine silteme jasap.

«Ótken jyly 2019 jylmen salystyrǵanda qylmys deńgeıi 38% - ǵa tómendedi. Qylmystyq quqyq buzýshylyqtar deńgeıi 36,5% – ǵa, asa aýyr qylmystar – 2%-ǵa, aýyrlyǵy ortasha jáne jeńil qylmystar – 51% - ǵa, jol-kólik oqıǵalary-24% - ǵa tómendedi»,- dedi óńir basshysy Mahambet Dosmuhambetov.

Sonymen qatar onyń sózinshe, basqarý ortalyǵynyń beınekameralarynyń kómegimen 286 qylmys, onyń ishinde 133 urlyq ashylyp, 17 myńnan astam ákimshilik quqyq buzýshylyq anyqtalǵan. Sondaı-aq, adamdar kóp jınalatyn jerlerde 6 modýldik polıtsııa beketi men oblys boıynsha qosymsha 10 statsıonarlyq beket ornatylǵan.

Óńir basshysy Mahambet Dosmuhambetov buǵan qosa, bıyl oblys aýmaǵynda taǵy 10 statsıonarlyq beket ashylatynyn jetkizdi.

Aıta ketý kerek, Atyraý oblysynyń ákimi Mahambet Dosmuhambetov onlaın formatta esep berdi. Turǵyndar suraqtaryn telefonmen jáne kommýnıkatsııanyń barlyq túrleri arqyly qoıyp, jaýap aldy.