Atyraý oblysynda quıyndy jel birneshe aýyldy jaryqsyz qaldyrdy
ATYRAÝ. QazAqparat – Atyraý oblysynda qatty jel birneshe aýyldy jaryqsyz qaldyrdy, dep habarlaıdy QazAqparat.
Oblystyq tótenshe jaǵdaılar departamentiniń baspasóz qyzmetinen málim etkendeı, keshe, 29 naýryzda qatty jeldiń saldarynan qutqarýshylarǵa 34 shaqyrtý túsken.
Keshe Atyraý oblysynda qatty jel shatyrlardy kókke ushyrǵanyn jazǵan bolatynbyz. Kardıologııa ortalyǵynyń shatyry búlinip, bir adam aýrýhanaǵa tústi.
«Qutqarýshylar kúsheıtilgen jumys rejımine kóshirilip, shuǵyl túrde avarııalyq-qutqarý is-sharalaryn júrgizdi. Táýlik ishinde «112» nómirine 34 qońyraý tústi. Onyń 28-i Atyraý qalasynan, al 6-ýy – aýdandardan. Qatty jelden 18 turǵyn úı, 3 balabaqsha, 3 medıtsına ǵımaraty, 1 mádenıet úıi jáne basqa nysandardyń shatyry búlindi. Shatyr men qabyrǵa qaptamasy búlingen nysannyń deni Atyraý qalasynda tirkeldi.
Qurmanǵazy aýdanynda mádenıet úıi men lokomotıv deposynyń shekara qyzmeti departamentine qarasty ǵımarattyń, Maqat aýdanynda turǵyn úılerdiń, Inder aýdanynda óner mektebiniń, Mahambet aýdanynda ortalyq aýrýhana men Aqtoǵaı aýylyndaǵy mekteptiń shatyry búlingen. Al Qyzylqoǵa aýdanynyń Taısoıǵan, Jamansor, Kenbaı, Jangeldın, Oıyl, Kózdiqara aýyldarynda jaryq sónip, abonentter qosymsha jelige qosyldy. Atalǵan eldi mekenderde zaqymdalǵan joǵary voltty elektr jelisin qalpyna keltirý jumysy júrgizilip jatyr», - dep habarlady departamenttiń baspasóz qyzmetinen.
Sondaı-aq, keshe Atyraý qalasyndaǵy «Saryqamys» shaǵyn aýdanynda, Qyzylbalyq Geolog, Aqjar aýyldyq okrýgterinde ekpindi jel saldarynan elektr jelisi úzilgen. Qazir barlyq abonentke elektr jaryǵy berildi.
Eske salaıyq, buǵan deıin Atyraý qalasynda tabıǵat qubylysynan kelgen shyǵyn kólemi anyqtalyp jatqanyn habarlaǵan edik.
