Atyraý oblysynda qurylys jumystarynyń kólemi 692 mlrd teńgeni qurady
NUR-SULTAN. QazAqparat - Atyraý oblysynda jyl basynan beri 615 myń sharshy metr turǵyn úı paıdalanýǵa berildi.
Bul týraly búgin Atyraý oblysynyń ákimi Mahambet Dosmuhambetov aıtty, dep habarlaıdy QazAqparat tilshisi.
«Qurylys jumystarynyń kólemi 692 mlrd teńgeni, naqty kólem ındeksi 104,3 paıyzdy qurady. Respýblıkadaǵy óńirdiń úles salmaǵy 19 paıyzdy quraıdy. Jyl basynan beri oblysta 615 myń sharshy metr turǵyn úı paıdalanýǵa berildi. 5 204 orynǵa arnalǵan 10 mekteptiń qurylysy júrgizilip jatyr. Apatty bir mekteptiń ornyna jańa bilim ordasy salyndy. Jyldyń sońyna deıin taǵy 4 mekteptiń qurylysy aıaqtalady. 5 nysan kelesi jyly paıdalanýǵa beriledi. Osylaısha, úsh aýysymdy jáne apatty jaǵdaıdaǵy mektepter problemasy kezeń-kezeńimen sheshiledi. Bıyl 15 balabaqshanyń qurylysy bastalǵan. Onyń ishinde 9 balabaqsha memlekettik-jekeshelik seriktestik aıasynda salynýda, 4-eýi paıdalanýǵa berildi», - dedi óńir basshysy Ortalyq kommýnıkatsııalar qyzmetindegi baspasóz máslıhatynda.
Sonymen qatar Mahambet Dosmuhambetov óńirde stýdentterge arnalǵan jataqhana, mádenıet úıi, demalys aımaǵy, sporttyq jáne densaýlyq saqtaý nysandary qurylysy qarqyndy júrgizilip jatqandyǵyn aıtty.
