Atyraý oblysynda qulaǵan elektr baǵanalary 1975 jyldan beri qoldanysta bolǵan
ATYRAÝ. QazAqparat – Atyraý oblysynda qulaǵan elektr baǵanalary 1975 jyldan beri qoldanysta bolǵan, dep habarlaıdy QazAqparat.
«Atyraý-Jaryq» AQ prezıdentiniń orynbasary Meıirbek Ǵubashevtyń málimetinshe, 5 naýryzda Qurmanǵazy aýdanynda joǵary kerneýli elektr jelisi tartylǵan 200 baǵana qulaǵan.
Buǵan qar aralas nóser jańbyr men qatty jeldiń soqqany áser etken.
«Sonyń saldarynan aýdannyń eldi mekenderi jaryqsyz, jylýsyz jáne baılanyssyz qaldy. Aýdanda qulaǵan baǵanalar 1975 jyldan beri qoldanysta boldy. Elektr energııasynan 10 890 abonent ajyratyldy. Mundaı jaǵdaı aýdanda alǵash ret bolyp otyr. Osyǵan baılanysty oblystan qosymsha 60 elektromonter, 22 arnaıy tehnıka, SV-10,5 baǵanasynyń 152 danasy, «Atyraý-Jaryq» AQ qorynan AS-120 mm jáne AS-50 mm symdarynyń eki oramasy jiberildi. Alaıda, Atyraý qalasy men Qurmanǵazy aýdany arasyndaǵy joldyń qazirgi jaǵdaıy, qashyqtyǵy eskerilip, baǵanalar bir reıske 10 danadan jetkizildi. Munyń bári, árıne, jumysty keshiktirdi», -deıdi Meıirbek Ǵubashev.
Onyń aıtýynsha, qazir Birlik, Kóptoǵaı, Kaspıı, Qamysty jáne Qules aýyldarynda VL-10 kVT jelisin qalpyna keltirý jumystary jalǵasyp jatyr.
Eske sala ketelik, buǵan deıin Atyraý oblysynyń Qurmanǵazy aýdanynda 400-ge jýyq elektr baǵanasy qulaǵanyn jazǵan bolatynbyz.
